Қазақстан мұнай өңдеу саласын кезең-кезеңімен дамытып, өндіріс қуатын жылына 40 млн тоннаға дейін жеткізуді көздеп отыр, – деп хабарлайды 7-su.kz ақпараттық порталы.
Мұнай-газ саласы қызметкерлері күні қарсаңында еліміздің энергетикалық әлеуетін арттыратын маңызды жоспарлар жарияланды. Межеленген мақсаттар отандық өңдеу өнеркәсібін жаңа деңгейге көтеріп, отын-энергетикалық кешеннің тұрақтылығын қамтамасыз етеді. Сондай-ақ Жетісу сияқты қарқынды дамып келе жатқан өңірлердегі көлік инфрақұрылымы мен ауыл шаруашылығын сапалы жанар-жағармаймен іркіліссіз қамтамасыз етуге зор мүмкіндік береді.
Соңғы жылдары салада оң динамика қалыптасты. 2024 жылы елімізде мұнай өңдеу көлемі 18,3 млн тоннаға жетіп, жоспарланған межеден 2,23%-ға асып түсті. Ал мұнай өнімдерін өндіру көрсеткіші 14,75 млн тоннаны құрады. 2025 жылы бұл көрсеткіш өсіп, мұнай өңдеу 18,4 млн тоннаға (жоспардан 4,5%-ға жоғары), ал өнім өндіру 15,47 млн тоннаға дейін көтерілді. Ағымдағы 2026 жылы 15,49 млн тонна мұнай өнімін өндіру жоспарда бар.
Саланы сапалық тұрғыдан өзгерту үшін Үкімет 2025–2040 жылдарға арналған мұнай өңдеуді дамыту тұжырымдамасын бекітті. Осы құжат аясында жұмыс істеп тұрған мұнай өңдеу зауыттарын кеңейту қарастырылған. Нәтижесінде кәсіпорындардың жиынтық қуаты 18 млн тоннадан 29 млн тоннаға дейін артады. Бұдан бөлек, жылына 10 млн тонна өнім өңдейтін жаңа ірі МӨЗ құрылысы қолға алынады. Жобалар толық іске асса, еліміздің мұнай өңдеу әлеуеті 40 млн тоннаға дейін жетеді.
Тұжырымдама шеңберінде мұнайды өңдеу тереңдігін 89%-дан 94%-ға дейін арттыру, мотор отындарын өндіруді ұлғайту және мұнай-химия өндірісін өркендету көзделген. Оған қоса, өнім сапасын экологиялық К4 стандартынан К5+ деңгейіне дейін көтеру қарастырылған. Аталған шаралар ішкі нарықтағы тәуелділікті азайтып, шикізаттық модельден толық өндірістік циклге өтуге жол ашады. Сапалы жанармай өңірдегі жүк тасымалы мен жол-құрылыс жұмыстарының өзіндік құнын төмендетуге ықпал етеді.
Ауқымды трансформация шикізатты тиімді пайдалануға әрі жоғары қосылған құны бар өнімдерді көбейтуге бағытталған. Саланың дамуы еліміздің экономикалық қауіпсіздігін нығайтады.
