Астанадағы жоғары деңгейдегі келіссөздер барысында Азия өңіріндегі маңызды серіктестікті дамыту мен экономикалық ықпалдастықты тереңдетудің жаңа бағыттары айқындалды, – деп хабарлайды 7-su.kz ақпараттық порталы Ақорданың баспасөз қызметіне сілтеме жасап.
Елімізге тарихи ресми сапармен келген Камбоджа Премьер-министрі Хун Манет Қазақстанға шақырғаны үшін Мемлекет басшысы Қасым-Жомарт Тоқаевқа ақжарма алғысын білдірді. Мәртебелі мейман екі мемлекет арасындағы дипломатиялық қарым-қатынастардың орнағанына 30 жылдан асқанын, осы уақыт ішінде өзара сенімге негізделген берік әріптестік қалыптасқанын ерекше атап өтті. Азия-Тынық мұхиты аймағындағы бұл мемлекет Орталық Азияның көшбасшысы саналатын Қазақстанмен сауда-экономикалық, энергетикалық және цифрлық саладағы байланыстарды кеңейтуге мүдделі.
Ақордадағы салтанатты келіссөздер барысында Камбоджа Премьер-министрі Хун Манет: «Бүгін энергетика секторындағы ықпалдастықты тереңдету мүмкіндігі туып отыр деп ойлаймын. Ведомстволарымызға өзара мүдделі бағыттарды анықтауды тапсыра аламыз. Қазақстан электронды үкімет бойынша айтарлықтай табысқа қол жеткізді әрі озық әзірлемелерге ие. Біздің министрліктеріміз осы салада тәжірибе алмасуға қызығушылық танытып отыр», – деді.
Тараптар саяси диалогты жандандырумен қатар, екі елдің профильді министрліктеріне өзара мүдделі әрі перспективалы бағыттарды анықтауды тапсыруға келісті. Әсіресе энергетикалық секторды дамыту, заманауи IT-инфрақұрылымды қалыптастыру және цифрлық мемлекеттік қызметтерді енгізу бойынша отандық тәжірибені экспорттау мәселесі басты назарда болды. Қазақстанның eGov жүйесі мен цифрлық шешімдері халықаралық аренада жоғары бағаланып, Оңтүстік-Шығыс Азия елдері үшін қызығушылық тудыруда.
Сонымен қатар тараптар көпжақты халықаралық алаңдардағы өзара қолдауды күшейтіп, сауда-саттық көлемін еселеуге ниетті. Осындай ауқымды халықаралық келісімдер Жетісу өңірі сияқты қарқынды дамып келе жатқан аймақтарға да жаңа мүмкіндіктер береді. Өңірдегі IT-хабтардың дамуы, аграрлық-индустриялық өнімдерді жаңа экспорттық нарықтарға шығару және инвестициялар тарту еліміздің экономикалық әлеуетін арттырады. Екіжақты әріптестіктің жаңа кезеңі тараптар үшін өзара тиімді нәтижелер әкеледі.
