«Энергетикалық және коммуналдық секторларды жаңғырту» ұлттық жобасы аясында Талдықорған қаласында жылу желілерін реконструкциялау және күрделі жөндеу жұмыстары толық аяқталды. Қаладағы 4,5 шақырымнан астам жылу жүйесі жаңартылды.
Ілияс Жансүгіров көшесіндегі №3 сорғы станциясынан Юрий Гагарин көшесіне дейінгі учаскеде диаметрі 700 мм болатын магистральдық жылу желілерін реконструкциялау (I кезең) жұмыстары жүргізілді. Жоспарланған 3,5 шақырымдық желі толығымен жаңартылып, жұмыс көлемі 100 пайызға орындалды.
Сонымен қатар Біржан сал көшесінің бойында, Нұрсұлтан Назарбаев даңғылынан Жамбыл Жабаев көшесі бағытындағы диаметрі 400, 300 және 250 миллиметрлік жылу желілері күрделі жөндеуден өтті. Бұл учаскеде де жоспарланған 1,02 шақырымдық жұмыс толық аяқталды.
Жүзеге асқан екі маңызды жобаның нәтижесінде Талдықорған қаласы бойынша барлығы 4,52 шақырым жылу желісі жаңартылып, қаланың коммуналдық инфрақұрылымы айтарлықтай жақсарды.
«Жетісу-Ақпарат».
