Талдықорғанда Қазақстан Республикасы Президентінің Жарлығына сәйкес 6 және одан да көп баланы дүниеге әкелген 12 анаға алтын және күміс алқа табыс етілді. Облыс орталығында өткен арнайы басқосуда қала әкімі Ернат Бәзіл батыр аналарды жүрекжарды қуанышымен құттықтап, ізгі тілегін жеткізді.
– «Халық даналығында, «Ана деген бір қолымен бесік тербетсе, бір қолымен әлем тербетеді» деген ұлы сөз бар. Мұндай теңеу бекер емес. Оның дәлелі, баланы дүниеге әкеліп қана қоймай, оған тәлім-тәрбие, сапалы білім беру, үлкен өмірге аттандырып, жеке тұлға болып қалыптасуына бағдар беретін абзал жан ол әрине – ана. Сондықтан ана күллі адам баласы үшін әрдайым ардақты» — деді шаһар басшысы.
Бұл жолғы құрметке бөленгендердің бірі – 6 баланың анасы, Тәуелсіздіктің төл құрдасы Бақытгүл Жангилдинова. Ол 5 ұл, 1 қызды тәрбиелеп отырған жас ана.
Осы орайда ол: — «Бір қозы туса, бір түп жусан артық шығады» деген. Әр балаға Алланың берер өз риздығы бар. Мен бүгінгі алып жатқан марапатым үшін қуаныштымын. Енді арманым сол балапандарымды аман-сау тәрбиелеп өсіріп, болашақта ұлтымыздың білімді де білікті азаматтары болып жетілуіне күш салу», -дейді.
Мамандардың мәліметінше, бүгінде Жетісу облысының орталығы Талдықорғандағы жалпы тұрғындар саны 200 мыңды құраса, оның, 6 мыңнан астамы көп балалы аналар.
Айдын КӘЛІМХАН
