Аймақтағы шаруа қожалықтарында туындаған өзекті мәселелер облыстық кәсіпкерлер палатасы жанындағы агроөнеркәсіп кешені және азық-түлік өнеркәсібі салалық кеңесінің кезекті отырысында талқыланды.
Кеңеске шаруа қожалықтарының жетекшілері, ауыл шаруашылығы саласымен байланысты басқармалардың өкілдері жиналды. Қазіргі кезде агроөнеркәсіп кешенін дамыту мәселесі аса маңызды. Аталған кеңес төрағасы Александр Хильниченко атап өткендей, бүгінде фермерлер арасында АӨК және азық-түлік өнеркәсібі саласында оң шешімін табуы тиіс мәселелер бар.
– Біз мал шаруашылығы, егіншілік және агроөнеркәсіп кешенімен байланысты барлық жұмыспен айналысатын кәсіпкерлердің түйткілді мәселелерін талқылау үшін жиналдық. Көптеген проблема бар. Олар негізінен қаржыландырумен байланысты. Атап айтқанда, күн райына байланысты биыл фермерлер үшін қиын болды. Бүгінде көптеген шаруа шатқаяқтап тұр. Өйткені, өнімділік климаттық жағдайға байланысты төмендеп, шығын өседі. Қазіргі кезде өнім бағасының қалай өсіп жатқанын жақсы білеміз. Сондықтан көптеген шаруа қаржылық қиындықтарға тап болуда, – дейді Александр Хильниченко.
Басқосуда күзгі дала жұмыстарын жүргізу, ауыл- шаруашылығы мақсатындағы жерлерді қосалқы жалға беру, отынмен қамтамасыз ету мәселелері де назарға алынды. Шаруа иелеріндегі шешілуі тиіс басқа да проблемалар қозғалды.
Облыстың жер кадастры бөлімінің бас маманы Самат Жұматаев ауылшаруашылығы мақсатындағы жерлерді қосалқы жалға беру – жалға беру келісімшартымен жалға берушіден қосалқы жалға алушыға ауылшаруашылығына пайдалануға арналған жер учаскесін беру үдерісін сөз етті. Осылайша, жалға алушының өзі жалға беруші болады және жер учаскесін басқа адамға береді.
– Ауылшаруашылығы мақсатындағы жерлерді қосалқы жалға беру қағидалары мен шарттары әртүрлі болуы және жергілікті заңдармен де анықталуы мүмкін екенін атап өткен жөн. Сондықтан жерді қосалқы жалға алуға қызығушылық танытқан кезде жергілікті билік органдарына немесе заң кеңесшілеріне осындай мәміленің талаптары мен рәсімі туралы нақты ақпарат алу үшін жүгінген жөн, – деді Самат Жұматаев.
Ауылшаруашылығындағы жерді қосалқы жалға беру түрлі мақсатта, мысалы, қосымша ауылшаруашылығы жұмыстарын жүргізу немесе қосалқы аумақтарды пайдалану үшін қолданылуы мүмкін. Қосалқы жалдау белгілі бір мерзімге жасалуы мүмкін және жалға алушы мен қосалқы жалға алушы арасындағы шартпен реттеледі.
Күзгі дала жұмыстары туралы облыстық ауылшаруашылығы басқармасы басшысының орынбасары Бақтияр Шампиков әңгімеледі. Ол техниканы жетілдіру, ылғал үнемдейтін суару жүйелерін енгізу, сапалы тұқымдарды пайдалану туралы әңгімеледі. Өңірдегі ауылшаруашылығы саласын дамытудың басқа да өзекті мәселелері аграршылармен бірге талқыланды.
Соңында облыстық кәсіпкерлер палатасының төрағасы Дәурен Оңалбаев: «Біз кәсіпкерлер палатасының алаңында облыс әкімінің орынбасарлары, тиісті басқармалардың өкілдері, уәкілетті органдармен үнемі кездесу ұйымдастырамыз. Мақсат – жергілікті жерлерде осындай күрделі мәселелерді тауып, оны атқарушы билік, басқа да жауапты лауазымды тұлғаларға жеткізіп, шешу жолдарын іздестіру», – деді.
Кеңестен соң тиісті уәкілетті органдарға ұсынымдар жолданды.
А. Байжұмақызы
Сурет: ғаламтордан алынды
