Сарқан ауданына ресми сапармен келген облыс әкімі Бейбіт Исабаев алдымен жергілікті тұрғындарды қабылдап, халықты алаңдатқан мәселелер жайын тыңдады, деп хабарлайды 7su.kz желілік басылымы.
Сарқан ауданы – әртараптандырылған ауылшаруашылық өндірісі бар аграрлық аймақ. 98 мың гектарға ауыл шаруашылығы дақылдарының 32 түрі егіледі. Аудан жалпы егіс алқаптары бойынша облыстағы алдыңғы қатардағы өңірдің бірі.
Қант қызылшасын өсіру аудан үшін дәстүрлі, мамандандырылған сала болып табылады. Ағымдағы жылы аталған дақылдың егіс алқабы 1,3 мың гектарды құрап, межелі жоспар 8,3 пайызға асыра орындалды. Сарқандық диқандар биылғы жылы тәтті түбірдің әр гектарынан 450 центнер өнім жинауды жоспарлап отыр. Бүгінгі таңда қызылша дақылын күтіп-баптау және өнімді уақытында жинауды қамтамасыз ету мақсатында шаруа қожалықтары жүйелі жұмыс жүргізуде.
Облыс басшысы биыл Ақсу қант зауытының өз жұмысын бастайтындығын, бұл қант қызылшасы алқабының көлемін одан әрі ұлғайту үшін қосымша мүмкіндіктерге жол ашатынын айтып, диқандардың көңіліне үміт сәулесін сыйлады.
