Жаркент өңірі тұрғындары үшін күзгі жүгерінің өнімі таудан келер қар суына байланысты.
Биылғы маусымның соңы мен шілде айының басы ыстық болып тұр. Бұл тау қарының молынан еріп, өзен суының толысуына оң ықпалын тигізеді. Жаңбыр да себелеп өтеді. Десек те диқандар «Жеті күн жауған жауыннан, желіп өткен су артық» деп таудан келетін өзен суымен егістік суаруды жөн көреді. Өткен жылға қарағанда биыл тау өзенінің суы мол. Осындай ылғалы мол жылы жаркенттіктердің төл дақылына айналған жүгерінің егіс көлемі жылдағыдан кеміген жоқ. Өңірде жалпы 26 700 гектардан аса алқапқа өсірілген «дала аруының» шығымы жақсы.
– Биыл егін суаратын судың тапшы екені рас, – дейді аудандық ауыл шаруашылығы бөлімінің басшысы Жұмағазы Наймантаев.
«Ұйымдастыра білген ұтады» демекші, «ҚазСуШар» ММ-нің Панфилов аудандық филиалы өндірістік учаскесі мұраптарының ұйымшылдықпен атқарған тынымсыз қарекетінің нәтижесінде егін суы тиімді пайдаланылуда. Жыл сайын өңір жүгерішілері шілде айының соңына дейін дақылды алғаш суарып үлгірсе, биыл 3 мың гектардан аса алқап 2 мәрте суарылған. Таудан түскен әр тамшы қар суын қожалықтарға кезегімен тең бөліп беріп отырған мұраптарға, оларды қауырт сәтте жетелі іске жұмылдыра білген мекеме басшысына айтар алғыс көп.
Қазір өңірде 13 767 гектардан аса жүгері алқабы 1 рет суарылып, 3 мың гектардан аса алқап 2-ші мәрте суарылған. Егін суару жұмысы Үшарал, Үлкеншыған, Бірлік, Басқұншаң және Пенжім ауылдық округтерінде қарқынды жүруде.
Мырзағали НҰРСЕЙІТ
