ҚР Премьер-Министрі Әлихан Смайыловтың төрағалығымен Үкімет отырысы өтті. Үкімет үйіндегі жиынға минстрлер, ведмоства басшылары жиылды. Сондай-ақ барлық облыс әкімдері селекторлық режимде қатысты. Кеңейтілген отырыста мемлекет басшысының сайлауалды бағдарламасын және Үкіметтің 12 желтоқсандағы кеңейтілген отырысында берілген тапсырмаларды іске асыру жөніндегі шаралар қаралды.
ҚР Премьер-Министрі Әлихан Смайылов жиынның басында Мемлекет басшысы жүктеген міндеттерді саралай келе әр министр өз саласы бойынша тапсырмалардың 100 пайызға орындалуына кепілдік беруі тиіс екенін қадап айтты. Сондай-ақ, жүйелі жұмысты жүргізе алмаған министр орнын босатады деп жауапты қызметкерлерді сынға алды. Үкімет отырысында қаржы, индустрия және инфрақұрылымдық даму, энергетика, ауыл шаруашылығы, цифрлық даму, инновациялар және аэроғарыш өнеркәсібі, экология, геология және табиғи ресурстар, еңбек және халықты әлеуметтік қорғау, денсаулық сақтау, оқу-ағарту, ғылым және жоғары білім, мәдениет және спорт, ақпарат және қоғамдық даму, әділет, төтенше жағдайлар, ішкі істер министрлері мен ұлттық экономика бірінші вице-министрі және т.б. баяндама жасады.
Осы ретте «Биыл біз күрделі геосаяси жағдайға байланысты бірқатар қиындыққа тап болдық. Бұл бағаның өсуіне, инфляцияға, экономикалық дамудың бәсеңдеуіне әкеліп соқты. 2023 жылы бізді жаңа сын-қатерлер мен тәуекелдер күтіп тұр. Сондықтан, біз Президенттің сайлауалды бағдарламасы мен тапсырмаларын сапалы іске асыру үшін барынша күш салуымыз керек. Сондай-ақ, біз кез келген жағдайға барынша тез әрекет етуіміз қажет», – деді Үкімет басшысы.
Сонымен қатар, әрбір әкім жергілікті жерлерде әлеуметтік-экономикалық мәселелердің сапалы шешілуін қамтамасыз етуі керек, – деп өңір басшыларына тапсырма берді.
Жиын соңында Жетісу облысының әкімі Бейбіт Исабев аталған мәселелер бойынша басқарма басшыларына тапсырма жүктеп, жұмысты ширату керектігін айтты.
ЖЕТІСУ-АҚПАРАТ
