Жетісудың жер- ұйық мекені Текелі ежелден мал мен жанға жайлы, сулы, нулы жер. Өнеркәсібі өркендеп, өндірісі дамыған моноқаладағы атқарылып жатқан жұмыстардың жай-жапсарын білу үшін ат басын Текелі қаласына бұрдық.
Баспасөзге жазылуға байланысты Текелі қаласына барған «Jetіsý» газетінің тілшілеріне моноқала әкімі Алмас Әділ өңірдің тыныс-тіршілігін баяндап, алдағы жоспарларын айтты. Сонымен қатар, өзі бір күндік, сөзі мың күндік ата басылым жайлы кеңінен әңгімеледі.
– Күнделікті баспасөзді бір шолып, әлем, дүние дүрмегіндегі жаңалықтарды, елдегі оқиғаларды тыңғылықты оқып, ой түю – менің бойымда бала күннен қалыптасқан әдет. Жастайымыздан газет-журналды жаздырып оқуды отбасымыздың тәрбиелік дәстүрі ретінде әкем бойымызға сіңірді. Бүгінде заманауи технологияның шарықтап дамыған кезінде де баспадан басылып шыққан газетті саралап, әрбір мақаланы үнемі қадағалап оқып отырамыз. Әсіресе, өңіріміздегі жаңалықтар туралы толыққанды ақпараттар мен тарихи тың деректерді, ойы оралымды әдеби шығармаларды облысымыздың «Jetіsý» және жергілікті «Текелі тынысы» газеттерінен оқу дағдымызға айналған. Дегенмен де, қазіргі кезде ширақ та жедел ақпарат әлеуметтік желіде көп әрі тез тарайтыны жасырын емес. Сондықтан қоғам ақпаратты көбінесе ғаламтор арқылы алып жатады. Сауалын да, өзекті мәселесін де интернетке жариялай салу үрдісі басым. Заман ағымына ілескен ресми ақпарат көздерінде жарияланған дүниенің дұрысын екшеп, нақты дерекке, дәйекке сүйеніп жазылған ақпаратты қабылдаған абзал дер едім. Бұл орайда да, «Jetіsýdyń» арнайы желілік басылымында шыққан материалдар, облыс жаңалықтары, тәрбиелік-танымдық мақалалар көпшілік оқырманның қажеттілігін қанағаттандырып отыр десек, артық айтқандық болмас. «Қару күшті емес, қару ұстаған күшті» дейді. Демек, білікті, қарымды біліміңмен биік боласың. Бәріміздің міндетіміз – халыққа адал қызмет. Бүгінгі қоғамның талабына сай пайыммен, ақыл-парасатпен жаңа құндылықтарды орнықтырып, жақсы қасиеттерді дамытуда Алаш ардақтысы Ахмет Байтұрсынов айтқандай, «халықтың көзі, құлағы һәм тілі» бола білетін, билік пен азаматтық қоғам арасындағы алтынкөпір іспетті баспасөздің беделі биік екендігі даусыз. Өркениеттің өріне ұмтылған ұлтымыздың ұстанымы өңірлік басылым «Jetіsý» газетінде ұтқыр да ұшқыр қаламмен шынайы бедерлене береді деп сенемін, – деп Алмас Қабдолұлы ыстық ықыласын білдірді.
Осыдан кейін, өңірде атқарылып жатқан жұмыстарға тоқталды. Жуырда моноқаланың әкімі болғанына 100 күн толады. Қаланы небары үш айдан астам уақыт басқарса да атқарып жатқан шаруалары аз емес.
Тарихы терең, тынысы кемел қаламызға биыл 70 жыл толды. Бастапқыда жұмысшылар поселкесі деп құрылған Текеліде қорғасын-мырыш комбинаты бой көтеріп, Екінші дүниежүзілік соғыста зауыт құрышынан құйылған оқтың жауды тізерлеткені тарихтан белгілі. Бүгінде жаңа тыныс, жаңа леппен даму жолына түскен Текелі тау туризмімен, мәрмәр, гранит өнеркәсібімен өлкенің өркендеуіне үлес қосып келеді. Биылғы 10 айдағы өнеркәсіп өнімінің көлемі 24,8 млрд. теңгені құрады. Қалада 42 өндірістік кәсіпорын бар. Жуырда ғана темірді тікелей қалпына келтірумен айналысатын тәжірибелік зауыт іске қосылды. Шағын және орта бизнес саласынан түскен салық көлемі 1,9 млрд. теңге. Кәсіпкерлікті дамыту бойынша ұлттық жоба аясында 89,6 млн. теңгеге 8 жобаға мемлекеттік қолдау көрсетілді. «Нұрлы жер» жобасымен 40 пәтерлі тұрғын үй бой көтеріп жатыр. Инфрақұрылымды жасқарту мақсатында тұрғын үй аулаларындағы жылу жүйелері жаңғыртылып, газ құбырларын тарту жұмыстары жүргізілуде.
Мемлекет басшысының өңірімізге іссапары кезінде міндеттеген тапсырмаларының қатарында тұрғындарды сапалы ауызсумен қамтамасыз ету болатын. Ол басты назарда. Аталған мәселені іске асыру бойынша «қолданыстағы ұңғымалардан инженерлік сумен жабдықтау желілерін салу» жобасы әзірленді. Ағымдағы жылы бөлінген қаражатқа дайындық жұмыстары жүргізіліп жатыр, негізі ауызсу мәселесі 2023 жылдың соңына дейін шешілетін болады. Республикалық бюджеттен қаржыландыру мәселесі қарастырылуда.
Кездесу соңында Алмас Әділ «Jetіsý» газетін барынша қолдайтынын айтып, ата басылымның ұжымына шығармашылық табыс тіледі.
Айдар ҚАЛИЕВ,
Жетісу облысы
