Талдықорғандағы Достық үйінде Жетісу облыстық қоғамдық келісім кеңестерінің қорытынды отырысы өтті. Жиында биыл атқарған жұмыстардың нәтижесі айтылып, келер жылға жоспар құрылды.
– Бүгінгі қоғамда саяси тұрақтылыққа қоғамдық келісімсіз жету мүмкін емес. Жалпы, бейбітшілік пен келісімнен артық ештеңе жоқ. Еліміз егемендік алғаннан бері әлемге татулығымен, достығымен ерекше ықыласқа бөленіп келеді. Сонысымен көпке үлгі. Осы тұрғыда Қоғамдық келісім кеңестерінің атқарып жатқан жұмысы орасан, – дейді Қоғамдық даму басқармасы басшысының орынбасары Серік Бимуханбетов.
Басқосуға Қаратал ауданынан келген Бақберген Ибрагимов аймақтағы жұмыстарға тоқталды. Көптеген істің ішінде ұлтаралық татулықты сақтау мақсатында шеттен келген қандасымен келіспеушіліктер болған көршіні де татуластырып жібергендігі айтылды. Сол сияқты Текеліден келген Константин Михайлұлы да моноқаладағы жағдай турасында сөз қозғады.
Жиын соңында Қазақстан халқы Ассамблеясының жұмысына белсенді араласып, қоғамдық тұрақтылық пен этносаралық ынтымақтастықты нығайтуға қосқан үлесі үшін Жетісу облысы қоғамдық даму басқармасының басшысы Болат Керімбектің Алғыс хатымен әр ауданнан келген 10 адам марапатталды және оларға арнайы сый-сияпат берілді.
Қали АСҚАР
