Алматы және Жетісу облыстары бөлінбей тұрған кезде аймақта 29 ірі, 69 орта, 1579 шағын кәсіпорын жұмыс істеп, 80 мыңнан астам жұмыскер нәпақасын айырды. Соның ішінде өңдеу өнеркәсібінде жұмыс істейтіндердің саны 60 мың адамды құрады. Ауыл мен мал шаруашылығы саласында кірісін еселеп отырғандар мен базар жағалап тіршілігін түзеп жүргендердің өзі де ел бюджетіне қомақты салым салып келді.
Егер экономикамыз өркендеді, өндіріс кеңейді, кіріс артты, тұрғындардың табысы еселенді десек, аталған еңбеккерлердің әрбірінің үлесі мол болғаны. Дегенмен, олардың бәрі бірдей еленіп, ескеріліп жатыр ма деген сұраққа нақты жауап беру қиын.
Журналист болған соң ел ішінде жиі болып, жақсыны да, жаманды да ой таразысынан өткізіп жүретініміз бар. Сол кезде көңілге медеу болатын, кейде «әттеген-ай!» деп тілімізді тістейтін тұстар да кездесіп қалады.
Соның бірі – министрлер, Парламент Сенаты мен Мәжіліс депутаттары, облыс, қала, аудан әкімдері жұмыс сапарымен қай өңірге барса да кәсіпкерлік, ауыл мен мал шаруашылығы салаларында шаруашылығы шалқыған, жұмысы реттелген, табысы толағай, 5-6 кәсіпкердің ғана жетістігін көрсететініміз. Жыл сайын, тіпті, ресми сапарлар бір жылда неше мәрте қайталанса да сол үрдіс жалғаса береді. Олардың аты-жөнін атап, түсін түстеудің керегі шамалы. Сондағы мақсат – «жоғары жақтан келген қонақтар кемшілігімізді байқап қалмасын, бәрі өркендеп, өсіп жатыр екен деп мақтап кетсін» деген ниет екенін түсінеміз. Бірақ шындықты жасыра берудің абырой әпермейтініне биыл көзіміз жетпеді ме?
Кәсіпкерліктің де сан тарау қиындығы бар. Оның қыры мен құпиясын терең зерделеп, қиындығына шыдағандар ғана табысқа кенеле алады. Сала мамандары арасында табысты күреп тауып, құрылғысын ай сайын жаңалап, әлемдік стандартқа сай жұмыс істеп жатқандар жетерлік. Араларында қарызды қарызға жамап, ай сайын шығынын несиемен жауып жатқандары да жоқ емес. Қалай болса да, олардың бәрі ел өркендесін, жұрттың әлеуметтік жағдайы жақсарсын, тұрмысымыз түзеліп, кәсібіміз дөңгелесін деп ойлайды. Сондықтан «кірісі жақсы өндірістер бюджетке мол қаржы құйып жатыр» деп елеп-ескеру, енді-енді бас көтеріп келе жатқан бизнес субъектілерін жұрт назарынан тыс қалдыру дұрыс емес. Жұмыс алға басуы үшін материалдық қолдаумен қатар, моральдық тұрғыда көтермелеудің де әсері күшті болатыны есімізден шықпасын.
Халқымызда: «Адам құлақтан азады, көңілден семіреді» деген нақыл сөз бар. Сондықтан жұмыс сапарымен келген лауазымды тұлғаларды тек шалқыған шаруашылықтарға ғана жетелей бермей, шағын өндірістерді аралатып, жұмысы тоқыраған кәсіпкерліктің жағдайымен таныстырып, ұмтылып жұмыс істеуіне шабыт берілсе, нұр үстіне нұр болар еді. Сондай-ақ, бұл қадам ел жағдайын білуге келгендердің де, тұрғындардың жағдайы мен бизнес субъектілеріндегі қиындықтарды бағамдап, ары қарай ел үшін ұтқыр ұсыныстар әзірлеуіне де сеп болар ма еді?!
Қ. ОМАРАҚЫН
Сурет ғаламтордан алынды
