Қазақ халқының абзал ұлдарының бірі Ахмет Байтұрсынұлы – ақын, қазақ тіл білімінің реформаторы, қазақ әдебиетін де, мәдениетін де зерттеуші ғалым, публицист, әдіскер, қазақ халқының рухани көсемі, ұлт ұстазы. Ол туралы Сәкен Сейфуллин: «Ахмет халықтың арын іздеп, өзінің ойға алған ісі үшін басын бәйгеге тіккен. Ахмет Байтұрсынұлы ұлтын шын сүйетін ұлтшыл», – деген болатын.
Мектебімізде «Ұлы ұстаз аманатын жас ұрпаққа насихаттау» тақырыбында ашық алаң өтті. Оған қонақ ретінде Сүлеймен Демирел атындағы университеттің аға оқытушысы ф.ғ.к., Б. Хасен және әл-Фараби атындағы Қазақ ұлттық университетінің профессоры ф.ғ.д. О. Жұбаева және ахметтанушылар арнайы шақырылды. Ашық алаң Алаш арысының туған топырағы Торғай өңіріндегі өлкетану музейімен танысудан басталды. Аталмыш музей қызметкерлері Байтұрсынұлы атындағы залмен мектеп оқушыларын онлайн форматта таныстырды. Кездесуде жарыса сөз алған алматылық ғалымдар жас ұрпақтың жадына ұлт перзентінің тұлғасын ұялатудың маңыздылығына тоқталды. Ғалымның шығармашылығы мен өмірі туралы зерттеу еңбектерімен бөлісті. Іс-шарада мектебіміз бен Сүлеймен Демирель атындағы университет арасында ынтымақтастық туралы меморандумға қол қойылды.
Ғалымның «Қырық мысалының» өзі оқушылардың бойында адамгершілікке баулып, еңбекке, білім алуға құштарлығын оятады. Шығармашылықпен жұмысты тереңдетуді қолға алған көркем еңбек пәні мұғалімі Назира Қаранқұлова мысал өлеңдерді қылқаламмен қағаз бетіне түсіртіп, орындалған суреттерден шағын көрме ұйымдастырды.
Қылқалам мен көркем ой жеткізетін, аса шеберлік пен талантты қажет ететін сурет өнеріне тосыннан келмеген Айдана Амантай Ахмет Байтұрсынұлының бейнесін көрермен алдында жылтыр құммен салып, өз бойындағы талантын көрсетті. Туындысын университет ұжымына тарту етті. Ақ қағаз бетіне сурет салып, жансыз бейнені тілсіз сөйлеткен Жансая Бахадыр ақынның «Аққу, шортан һәм шаян» мысалын қылқаламмен сөйлетті. Осы туындылармен оқушыларымыз «Жас дарын» балалар орталығы ұйымдастырған «Алаш ардақтысы» атты республикалық байқауға қатысып, бас жүлде мен бірнеше орынды иеленіп, жетекшілерімен бірге марапатталды. Қазақ тілі мен әдебиеті пәні мұғалімдері оқушыларға «Мысал өлеңдердің тәрбиелік мәні» тақырыбында эссе жаздырды. Жұмыстары бағаланып, оқушылар марапатталды.
Мектебіміздің қазақ тілі мен әдебиеті пәні мұғалімі Азиза Жұбанова өзі сценарийін жазған, қазақ тілі мен әдебиеті пәні мұғалімі Жұмахан Зерипов рөлін сомдаған сахналық қойылым көрерменге ғалымның өзін көргендей әсер қалдырды.
Елінің бағы жану үшін өмірін арнаған, қазақ ғылымы тарихында ұлттық әліпби жасап, жаңа үлгі ұсынған реформатордың өнегелі жолы мен өлмес еңбектерін таным таразысына сала отырып, тағылым дарыту, тəлімін үлгі ету тек мұнымен шектелмейді. Мектеп ұжымы ұлт ұстазы салған сара жолды жалғастырып, ата-баба аңсаған, ұлт зиялылары жанын пида еткен тәуелсіздіктің туын жықпай ұстайтын азамат тәрбиелеу үшін барын салады.
Тоғжан КЕНЖЕБАЕВА,
А. Байтұрсынұлы атындағы орта
мектептің қазақ тілі мен әдебиеті пәні мұғалімі
Жібек жолы ауылы,
Қарасай ауданы
