Талдықорған қаласының маңында орналасқан «Жер-Ана» өндірістік ауылшаруашылық кооперативі көптен бері ауылшаруашылық дақылдарын өсірумен айналысып, қала жұртшылығына таза сүт жеткізіп тұрады. 1554 гектар жайылымы мен 478 гектар суармалы жері бар шаруа қожалығында етті-сүтті бағыттағы асыл тұқымды «Монбельярд» сиыры сауылады. Өндіруші зауыттарға жылына 70 тоннаға жуық сүт өткізетін кооперативтегі сауын сиырдың саны 300-ден асады. Науқанға орай жұмыспен 15-20 адам қамтып отырған шаруашылық жұмысшыларын баспанамен қамтамасыз етіп келеді.
Жетісу жеріне арнайы іссапармен келген ҚР Парламенті Мәжілісінің депутаты – «Nur Otan» партиясы фракциясының мүшесі Жанна Телпекбаева жергілікті жұртшылыққа септігін тигізіп отырған аталған өндірістік ауылшаруашылық кооперативінің жұмысымен танысып, шаруашылыққа қарасты техникалардың әбден ескіргенін, жаздың аптап ыстығында егістікке су жетпейтінін сұрап білді.
Соған орай «Жетісу» ӘКК» ӨДИ» АҚ Басқарма төрағасының орынбасары Азамат Рахимов ауылшаруашылық техникаларын лизингке алдырудың жолдары қарастырылып жатқанын жеткізді.
Одан соң арнайы келген жұмыс тобын офисіне апарған шаруашылық меңгеруші Әнуар Бөкенов карта алдында тұрып, су жүретін арықтардың жайын таныстырды.
Оның айтуынша, қант қызылшасын, жүгері, арпа-бидай сынды дақылдар мен жоңышқа, люцерна сияқты шөп өсіретін шаруашылық жаздың ыстығында судың зардабын тартып отыр. Өйткені, Балықты өзенінің бас жағындағы шаруалар дәл егістік суаратын кезде суды бұрып әкететіндіктен су жетіспейді. Осыған орай арнайы су қоймасын құрудың жобасы жоспарланған. Алайда жуық арада берілмейтін болып тұр.
Осыған байланысты жауап берген облыстық құрылыс басқармасы басшысының орынбасарын Еркебұлан Османбаев өзен суының шығынын болдырмау үшін арнайы бетон арық салуды қолға алған «Монолит» жауапкершілігі шектеулі серіктестігі өз жұмысына салғырт қарап, арна құрылысын мерзімінде жүргізбегенін, соған орай тапсырыс беруші, облыстық құрылыс басқармасы сотқа бергенін, соттың алғашқы отырысы талаптың дұрыс екендігін айтып, серіктестікті міндетіне алған жұмысты бітіруге мәжбүрлейтін шешім шығарғанын айтып өтті. Алайда сот шешіміне наразылық танытқан «Монолит» ЖШС қайта шағымданған. Соған байланысты нақты шешім шыққанға дейін 1 айдай уақыт бар.
Айтылған мәселелерді толық танып, түйткілді тақырыптың түйінін тарқатуға ықпал ететінін айтқан Парламент Мәжілісінің депутаты Жанна Телпекбаева шаруаларға қолынан келген көмегін көрсететінін атап өтті.
Мәди АЛЖАНБАЙ
Алматы облысы
