Талдықорғанда жоғалған 14 жасар бозбала табылды.
Алматы облыстық полиция департаменті таратқан мәліметке сенсек, 15 қаңтар сағат 17.00 шамасында Талдықорған қаласының полиция бөліміне Ақсу ауданының 41 жастағы тұрғыны жүгінген. Ол 14 жасар ұлының жоғалғанын айтып арызданған. Арызда көрсеткендей, ол ұлымен бірге Талдықорған қаласына туыстарына келген.
Сағат 14-00 шамасында әжесі баланы құлаттың деп ұрысқаны үшін ренжіп, үйінен белгісіз бағытта шығып кеткен. Өздері іздеп таба алмағаннан кейін полицияға арызданған. Аталған факті полицияда тіркеліп, із-түзсіз жоғалған кәмелетке толмаған баланы іздестіру ұйымдастырылды.
Белсенді іздестіру іс-шараларының нәтижесінде Талдықорған қаласы полиция бөлімі ювеналды полиция тобының аға инспекторы, полиция капитаны Жандос Матақпаев жергілікті жерді аралап жүріп, «Қызылтас» саяжай жақтағы жолда жоғалған жасөспірімді тапты. Профилактикалық әңгімеден кейін полиция қызметкерлері баланы әкесіне қайтарып, ол өз кезегінде полицейлерге жақсы жұмысы үшін алғыс айтты.
«ЖЕТІСУ-АҚПАРАТ»
