Су – тіршілік нәрі. Оның таза әрі үздіксіз берілуін қамтамасыз етуде «Талғар су» мекемесі тынымсыз жұмыс жасауда. Жасыратыны жоқ, қыс айларында ауызсу құбырларының қатуы, жазда арық суының арнасынан асып кетуі сынды төтенше жағдайлардың жиі орын алатыны жасырын емес. Бұған тартылғанына талай жыл болған су құбырларының ескіруі басты себеп. Десе де «Жол картасы» инвестициялық бағдарламасы негізінде атқарылып жатқан жұмыстар жоқ емес.
— Біздің мекеме мамандары тұрғындарды сумен қамтамасыз етуде жыл бойы үздіксіз жұмыс істейді. Сумен қамтамасыз ету – Талғар ауданы бойынша өте күрделі мәселе. Тұрғындарды толғантқан мәселенің түйіні тарқатылуда. Атап айтсақ, су құбырлары ауысуда. Мысалы, Қызылқайрат ауылындағы шамамен 38 шақырымды құрайтын су құбырларын жаңартуға 530 млн.теңге бөлініп, толық ауыстырылды. Қазір судан проблема жоқ. Сол сияқты Жалғамыс, Қызылту, Кіші Байсерке, Бесағаш ауылдарының су құбырлары толық жаңартылды. Енді Тұздыбастау, Панфилов (СНК) және Талғар қаласы бар. Бүгінге құжаттары дайын, қаржы бөлінсе, құбырларды жаңарту жұмыстары басталады, – дейді аудандық «Талғар су» ШЖҚ МКК кәсіпорнының бас инженері Кеңес Сүлейменов.
Биыл Талғар қаласының барлық көшесіндегі арық жүйесі 90 пайызға жасалған. Тұтынушылар ауызсуды үнемдеп, бау-бақшаны арық суымен суғаруға көшсе, су тапшылығы болмайды деген ойымен бөлісті. Былтырғы жылғы инвестициялық бағдарлама бойынша бөлінген 24 млн. теңге толығымен игерілген.
Тарқатар болсақ, өткен жылы Талғар қаласы, Бесқайнар ауылы, Қотырбұлақ елді мекенін сумен қамтамасыз ету бойынша инвестициялық бағдарламаны орындауға жұмсалған шығындардың жоспарлы сомасы 8 215 500 теңге, нақты орындалғаны 8 507 000 теңгені құраған.
Талғар ауданының Тұздыбастау, Бесағаш, Рысқұлов, Береке, Дәулет, Кіші Байсерке, Жаңалық, Жалғамыс, Қызылту, Еламан, Панфилов, Көктал, Сақтан, Достық, Қызылқайрат ауылдарын сумен жабдықтау инвестициялық бағдарламаның 3 500 000 теңге сомасындағы жоспары 3 555 700 теңгеге артығымен орындалған.
Су бұру (кәріз) Талғар қаласы, Панфилов ауылы, Бесағаш пен Дәулет ауылдары бойынша 12 189 200 теңгеге жоспарланып, іс жүзінде 12 003 600 теңге игерілген.
Объектілерде ЭЦВ тереңдік сорғылары, екінші көтеру сорғылары, фекальды сорғылар, электр қозғалтқыштары, тереңдік кабелі, СУЗ стансысы, «ұшу» шығын өлшегіші, газ талдағыш, асфальтты кесуге арналған станок, түрлендіргіштер, генератор, мотопомпа, ысырмалар, компьютер, электрмен дәнекерлеу аппараты, шойын люктер сатып алынып, орнатылғаны баяндалды. Сондай-ақ, техникаларды жоспарлы арнайы жөндеу, объектіні газдандыру да назардан тыс қалмаған.
Қысы-жазы халықты сумен қамтамасыз етуде тыным таппайтын бұл мекемеде 252 адам еңбек етіп келеді. Олардың ортасында тәжірибесі толысқан, өз ісінің нағыз шеберлері де көптеп саналады.
Ұлбосын БӨРІБАЙҚЫЗЫ
Талғар ауданы
Алматы облысы
