Кеңесті жерде келісім бар. Келісім болса кеңдік асқақтайды. Шындығында әрбір мемлекеттің өз ішінде келісім орнаса даму көкжиегі жақындап, ынтымақ мен береке қанат қағады.
18 қазанның елімізде Рухани келісім күні ретінде аталып өткеніне биыл 29 жыл толып отыр. Елбасы Нұрсұлтан Назарбаевтың тапсырмасымен көпұлтты және көпдінді Қазақстан Республикасы атаулы күнге ерекше назар аударуда. Еліміздің тыныштығы мен тұрақтылығы, бейбітшілігі мен ырыс-құты өзара тығыз келісімге байланысты екендігін осы күні ұғынып отырмыз. Шындығында әрбір отбасы, көршілер, ауылдар, аймақтар, мемлекеттер арасында өзара келісімнің арқасында Жер бетіндегі ынтымақ тұрақтап тұрады. Ондай болмаған жағдайда ел ішінде бүлік белең алып, мемлекеттер арасындағы қақтығыстар туындайтыны шындық. Осыны жақсы ұққан халқымыз өзара келісім жасасуды, ауызбіршілікті көтеруді ұлықтап, өскелең ұрпағына үйретіп отырған. Соның арқасында кең-байтақ Қазақ еліндегі ынтымақ пен келісім өзге елдерге үлгі болып отыр. Құдай көп көрмесін дейік, елімізде әлемдегі діндердің съезі өткізіліп, қырғын соғыс жүргізіп отырған мемлекеттерді татуластыруға арналған шаралар ұсынылды. Оған мысал ретінде Сириядағы соғысты тоқтатуға арналған Астана саммитін айтуға болады. Одан бөлек, 2010 жылы Еуропадағы Қауіпсіздік және ынтымақтастық ұйымына төрағалық еткен Қазақстан Республикасы күллі әлемнің назарын өзіне аудартып, елдер арасындағы әлеуметтік-экономикалық қарым-қатынастардың нығаюына ықпал еткені тағы бар. Шанхай ынтымақтастық ұйымына мүше еліміз Азия атты алып құрлықтағы тыныштық пен бейбітшіліктің тұрақтануына елеулі үлес қосты. Осындай ауқымды істерді ғана термелеп шықсақ, Ұлы Даланың бейбітшілік бесігіне айналғанын байқаймыз. Одан басқа біз білмейтін көптеген игілікті шаралардың басы-қасында еліміздің жүргені анық. Сондықтан Жаратқан Алла Тағала берген қарым-қабілетіміз баянды болуын іштей тілеп, еліміздің Тәуелсіздігі ғасырларға жалғасуын сұрайық.
Міне, бір ғана келісімнің төңірегінде осындай ізгілікті тақырыпты көтеруге болады. Өйткені, бұл дүниеде адам баласына мамыражай тіршілік, бейбітшілік, тыныштық, тұрақтылық керек. Осыны жақсы білген халқымыздың ертегілеріне көз салсақ, әрбір аңыздың соңы: «Қой үстінде бозторғай жұмыртқалаған заман келіпті» – деген сөзбен түйінделетінін байқаймыз.
Ендеше, бейбітшілік пен тыныштық, ынтымақ пен ырысты қалыптастыратын өзіміз екенін ескеріп, келешегіміздің жарқын болуы жолында ұрпағымызға тек жақсылықты үйретуді ұмытпайық!
Мәди АЛЖАНБАЙ
