Кеген ауданының тұрғындары Бексырға Данышпановты жақсы таниды. Биыл 80 жасқа толатын Бексырға Данышпанов Ұзынбұлақ ауылында туып-өскен. Мәнді де мағыналы ғұмырын туған жерінің өсіп-өркендеуіне арнады.
Кеген аудандық партия комитетінің хатшысы, бірінші хатшысы болып жемісті еңбек етті. Алматы облыстық ауылшаруашылығы басқармасы басшысының орынбасары, Алматы қалалық жер қатынастары комитетінің төрағасы, облыстық көші-қон және демография, орман-тоғай және биоресурстар басқармасының басшысы қызметтерін атқарды. Қазақстан Республикасы Төтенше жағдайлар министрлігінің «Қазселденқорғау құрылыс» кәсіпорнын басқарды. Қазақ КСР Жоғарғы Кеңесінің депутаты болып сайланды. Вашингтондағы Мэриланд университетінің жер пайдалану және аймақтандыру кафедрасынан білім алған. География ғылымының кандидаты ерен еңбектері үшін Еңбек Қызыл Ту, «Құрмет белгісі» ордендерімен, көптеген медальмен марапатталды.
Қоғам қайраткері, ел ағасы Бексырға Данышпанов соңына ізгілікті істерін қалдырып жүрген бірегей жан. Әйгілі Қарқара көтерілісінің 70 жылдығында өзі бас болып Ереуілтөбеге ескерткіш орнатуға негіз қалаған азамат. Қажымай-талмай, ерінбей еңбектеніп, көз майын тауысып жүріп, әлемдегі ұлы тұлғалардан қалған қанатты сөздерді тәржімалап, «Даналық тағылымы» атты кітап шығарған. Жақында ғана өзі басқарған «Қарқара» кеңшарының 90 жылдығына арналған «Қарқара» атты кітабы жарық көрді. Бұл кітапта «Қарқара» кеңшары туралы ғана әңгіме айтылмай, деректер, дәйектер, архив құжаттары арқылы қастерлі де қасиетті Қарқараның тарихи құндылықтары ашып көрсетілген. Кітап сонысымен құнды. Өсер ұрпаққа қажетті рухани азыққа толы.
Жақында Қарқара ауылында қоғам қайраткері, ел ағасы Бексырға Данышпановтың «Қарқара» атты кітабының тұсауы кесілді. Кітап авторының атына ақжарма тілектер айтылды. Ауыл азаматтары атынан иығына шапан жабылып, астына ат мінгізілді.
Қанат БІРЖАНСАЛ
Кеген ауданы
