Кеген ауданында көктемгі дала жұмыстары қарқын ала түсті. Биыл өңір бойынша 7 мың гектар алқапқа жаздық бидай мен арпа себіліп, 2400 гектар жерге картоп отырғызылады. 270 гектар жерге көкөніс өсіріледі.
Ауыл әкімі Жасұлан Өмірзақов бастаған Бөлексаз ауылының шаруа қожалықтары бір жағадан бас, бір жеңнен қол шығара отырып дәнді дақыл өсірумен айналысып келеді. Өткен жылы ауыл бойынша 250 гектар жерге жаздық бидай мен арпа себіліп, әр гектардан 20 центнерден өнім алынды. Жалпы, Бөлексаздың қара топырағы ылғалды келеді. Жыртылған жерлер мен дән себіліп жатқан өңірлердің ылғалды екенін көріп, қуанып қалдық.
– Бөлексаз ауылдық округі бойынша биыл 300 гектар жерге дәнді дақыл себу жұмысын жүргізіп жатырмыз. Ауданымыздың әкімі Т.Байедилов ауылдың тау жағындағы өңірден 100 гектарды егістік алқапқа айналдыру үшін тұрғындардың игілігіне берген болатын. Міне, сол өңірлерге соқа түсті. Өздеріңіз көргендей, құнарлы әрі ылғал топыраққа себілген дән өсімі жаман болмас, – дейді ауыл әкімі Жасұлан Өмірзақов.
Бөлексаз ауылында 200-ден аса отбасы болса, соның жартысына жуығы бірлесіп дәнді дақыл өсірумен айналысуда. Осы орайда игілікті істің басы-қасында жүрген Самат Әлімғожаев, Бәзілжан Иманбеков, Қызай Бейсен, Ержан Көке, Ернат Жанбабаев, Серік Құныпияев секілді ауыл азаматтарын айтуға болады. Ең бастысы, Қарқара ауылдық округіне қарасты Оразалы Омаров басқаратын «Мирас» шаруа қожалығының трактор, техникалары көктемгі науқанға қолдау көрсетуде. Жер жырту жұмысымен айналысып жүрген өз ісінің шынайы шебері Алмас Бопаев, Махамбет Шүкіров секілді механизаторларға алғыстан басқа айтар жоқ.
Қанат БІРЖАНСАЛ
Кеген ауданы
Алматы облысы
