Жыл жылжыған сайын Жеңіс күнін қарсы алатын соғыс ардагерлерінің қатары сиреп барады. Мұқағали Мақатаев: «Уақытты тоқтатар шамаң бар ма? Бәрі өтеді: дәуірлер, замандар да», – деп жырға қосқан уақытқа ешкім тұсау бола алмайды.
Сұм соғыстың зардабын тартып, майданға қатысқан әрбір көзі тірі қария таңның атысы, кештің батысы «соғыс болмаса екен» деген тілекпен өмір сүруде. Бейбіт күнге шүкір айтып отырғандардың қатарында ақсулық ардагер Гаврил Моисеев те бар. Гаврил Степанович 1922 жылы 25 наурызда Ақсу ауданы, Қапал ауылында дүниеге келген. Әкесі Степан Моисеев «Жетісу» казак полкінде қызмет етсе, анасы Наталья Бедарева да казак полкінің құрамында болған. Жетісу казак әскерінің маңызды міндеттерін орындаған ата-анасы ұлдарын да темірдей тәртіпте тәрбиеледі. 1929 жылы Қапал бастауыш мектебінің табалдырығын аттаған Гаврил Моисеев 1939 жылы жетіжылдық оқуын аяқтайды. Содан кейін ол Қапал педагогикалық училищесінде білім алып, оның тек екі курсын тамамдаған. 1941 жылы соғыс басталғанда Қызыл Армия қатарына алынып, Семей қаласында 219-шы атқыштар дивизиясында әскери борышын өтейді. Сол жерде жүріп, Томбовтағы жаяу әскерлер оқу орнына жіберіледі. Содан бастап Қызыл Армия қатарында 1943 жылға дейін болды. 19 жасында Батыс Ресей майданына аттанады. Майданның түрлі бөлімшелерінде жүріп, шайқасқа қатысқан ақсулық ұлан Жеңіс күнін жақындатуға барын салады. Алайда 1943 жылы ауыр жарақат алғаннан Алматы госпиталіне жіберіліп, емделіп шаққан соң І-топ мүгедегі ретінде туған жеріне қайтуға тура келеді.
Қайтып келгеннен кейін Гаврил Моисеев Қапал орта мектебінде әскери офицер болып жұмыс істеп, жастарды отансүйгіштікке баулыды. Осылайша еліне қорған болар ержүрек ұландарды тәрбиелеуге барын салды. 1946 жылы Қапал аудандық кинотеатрына жұмысын ауыстырып, 1973 жылға дейін әртүрлі қызметте абыройлы еңбек етті. 1973 жылдан бастап күзетші болып жұмысын жалғастырды.
1945 жылы өмірлік жары М. Клименкомен шаңырақ көтеріп, 63 жыл бірге ғұмыр кешкен екеуі 4 ұл өсіріп, жеткізді. Жан жары 84 жасқа келіп, 2008 жылы өмірден озды. Келесі жылы екінші ұлы қайтыс болып, екі бірдей қаза қартты қажытты. Қазіргі таңда кенже ұлы мен келінімен бірге тұрады. Үлкен ұлы Украинада, үшінші ұлы Орал қаласында қызмет етіп жүр. Гаврил Моисеевтің өнегесі көпке үлгі, әсіресе, артынан ерген ұрпағы атасының ерлігін мақтан етеді.
Мәулен ӘНЕРБАЙ
