Қарадала өңірі ежелден жеміс пен көкөністің отаны іспетті. Былтыр аудан бойынша 34 млрд. теңгенің ауылшаруашылық өнімдері өндіріліп, нақты индекс көлемі 104 пайызға орындалды. Сондай-ақ, 623 гектар бақша отырғызылды. Оның ішінде «Шонжы АГРО» ЖШС 200 гектарға абрикос көшетін екті. Жемістің экспорттық әлеуеті де жақсы деңгейде. Шаруа қожалықтары өткен жылы Ресейге екі жарым мың тонна абрикос сатты. Екі мың тонна өрік Солтүстік Қазақстан облысының тұрғындарына өткізілді.
Аудан тұрғындары ағымдағы жылы бау-бақша көлемін 400 гектарға ұлғайтуды жоспарлаған. Ендігі кезекте алынатын өнімді одан әрі үйлестіру мәселесі туындайды. Бұл орайда «Агропроцессинг» ЖШС қолға аған зауыт үлкен көмек көрсетеді. Осы жұмысты жандандырып, жеміс өнімдерін сыртқа жөнелту үшін «Ашимов» ЖК құрылымы пластикалық қорап шығаратын цехты іске қосуды жоспарлап, қажетті жұмыстар жүргізуде.
Өңірде жылыжай шаруашылығы да дамып келеді. Өткен жылы бір гектар жерге типтік жылыжай салынса, биыл үш гектар жерге 3 типтік жылыжайды іске қосу жоспарланып отыр. Ауданда 348 шаршы метрді құрайтын 4 отбасылық жылыжай жұмыс істеп тұр. Шошанай ауылындағы «Атамқұлов Саят» ЖК және Бахар ауылындағы «Аллабердиев Румин» атты құрылымдардың жылыжайлары ауыл мен аудан тұрғындарын көкөніспен қамтамасыз етіп келеді.
Қ. САТЫБАЛДЫ
Ұйғыр ауданы
