Талдықорған қаласында «EvaRt» репродуктивті денсаулық орталығы есігін ашты. Бұл істі гинекология саласы бойынша 26 жылдық тәжірибесі бар дәрігер-гинеколог Ирина Кудинова іске асырып отыр.
Ирина Кудинова гинекология саласы бойынша біліктілігі мен білімі жоғары маман. Дәрігер Талдықорған қаласында өмірге бала әкелу жасындағы қыз-келіншектер санының 29 мыңнан асқанын жеке зерттеулер арқылы анықтаған. Сөйтіп, шағын гинекологиялық клиника ашуға үлкен сұраныс бар екеніне көз жеткізіп, өзінің гинекология саласы бойынша жеке бизнесін ашуға шешім қабылдаған. Себебі, бұл қазір медициналық қызмет көрсету бойынша сұранысы мол бірден-бір сала және бизнестің тұрақты табыс көзі саналады.
Кәсіпкер нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасын пайдалана отырып, «Даму» қорынан кеңес алды. Несие алу бағдарламалары туралы толық ақпарат алғаннан кейін «Қазақстан Халық Банк» АҚ-ға өтініш білдіріп, 6 пайыз көлемінде несиеге қол жеткізді. Ал кепілдігінің жетпейтін бөлігіне «Даму» қоры кепілдік берді. Алынған қаражат медициналық жабдық сатып алуға жұмсалды. Сөйтіп, қала орталығынан жалға ғимарат алып, «EvaRt» репродуктивті денсаулық орталығын ашты.
Айгүл БАЙБОСЫНОВА
