Әпкем айтқан әңгімелерден халқымыздың өткенін ұғып-білуші едік. Ол жиырмасыншы ғасырдың қырқыншы жылы сәуір айында дүниеге келген. Отан соғысының зардабы мен кеңестік қоғамның қалыптасуын көзбен көріп, ауыртпалығын бастан өткізген. Мен әңгімелегелі отырған Қаратал ауданы Елтай ауылының тумасы Гүлжан Сәдуақасқызы. Алла тағаламның қалауымен Гүлжан әпкемен құда болдық. Көпшіліктің арасында құдағи деп, жеке отбасылық сыйластықта әпке дейтінмін.
Балалық дәурені аумалы-төкпелі кезге тап келгендіктен ол кісінің құрбы-құрдастары балғын шақтың бал дәмін тата алмаған.Үй-шаруасына жастай араласып, үлкендерге қолқабыс еткен ол інісіне қамқор бола жүріп, оқуынан да қалмаған. Бала кезінде әкесінің сүйіспеншілігі мен қамқорлығынан айырылып, сағынышпен өмір кешкен. Сондай қиындықтарды белі бекімей жатып бастан өткерген. Бірақ, мойымаған. Сол үшін де мен ол кісіні ерекше құрметтейтінмін. Әпкеміз өмірдің бояуын құбылтып, өрнек салып, жас ұрпақ санасына білім дәнін сепкен абзал жан. Ол ұлағатты әңгімелері арқылы жан-жағындағыларға ой салып, адамдыққа тәрбиелейтін. Әр адам үшін жүрегін ашып, бойындағы асыл қасиеттерін беретін. Ұстамдылығына тәнті едім. Басымыз қосылып, әңгімеге жол бергенде өткен өмірден сыр шертуші еді. Ұйып тыңдайтынбыз. «Сөз сөзді қуады» демекші, әпкеміз бізді де тақырыпқа араластырып әкететін. Әңгімеге пікірімізді қалай білдіргенімізді білмей қалатынбыз. Қазақ тілі мен әдебиетінің мұғалімі болғандықтан ана тілімізге деген ілтипаты әр сөзінен байқалатын. Ел, жер, тарих жайлы әңгімені айтқанда ұйып қалатынбыз. Тірі болғанда Гүлжан әпке биыл 80 жасқа толатын еді. Ол кісінің ізгі қасиеттері туралы ой толғау – сағынғандықтың нәтижесі. Әпкемді сағынып, сырласқым келіп шарқ ұрып іздейтін кездерім болады. Сәуір айында туған күні еді. Ол кісіге айтар жаңалығым көп. Соны қағаз бетіне түсіргім келді. Әпке, рухыңыз еститін шығар. Сізге біраз жаңалықты жеткізсем деп едім.
Әпкетай, бүгінде 13 немере, 10 шөбереңіз бар. Жаратқан ием тіл-көзден сақтасын! Аллаға шүкір! Қара шаңырақтың иесі – Еділ отбасымен аман-есен. Бірінші сыныпқа өзіңіз жетектеп апарған Айболыңыз «Сүлеймен Демирел универститетінің тәлімгері. Екінші ұл – Арсен «Қазақстандық халықаралық лингвистикалық колледжінің» мұнай-газ саласы бойынша ағылшын тілінің аудармашысы мамандығын меңгеруде. Мықты күйші! Кенже немереңіз Алан білімді және өнерлі. Грузин халқының билерін тамаша билейді. «ТЭМО» грузин би ансамблінің абыройлы мүшесі. Сонымен қатар, математика және ағылшын пәндеріне көңіл бөліп, оқып жүр.
Гүлжан әпке, Айбол, Арсенмен сабақ пысықтап, сынып сағаттарына барғаныңыз жайлы айтып, немерелеріңізді мақтан тұтушы едіңіз. Жеті айлық болып, шала туған немереңіз Алан биыл төртінші сыныпта оқиды. Осы немереңіз туғанда: «Алла қаласа ертең-ақ ержетеді. Жеті айлық туғандар пысық болады» деп едіңіз. Айтқаныңыз айдай келді. Балақай пысық! Үш ағасынан кейін дүниеге келген Дәния да ақылды. Данияның бір жасқа толған және тұсаукесер тойын өткіздік. Тойға бауырыңыз Ертөстік пен жары Сәуле де келді. Үлкен ұлыңыз Жидебайдың кенжесі Мұхит үйленіп, өмірге шөбере келді. «Әлгі Мұхитым қайда жүр екен? Келетін уақыты болды. Әлі жоқ», – деп жолын күтіп отыратын Мұхитыңыз да шаңырақ құрды. Бейбіт ұлыңыздың баласы Алмас үйленіп, ұл бала дүниеге келді. Ұлыңыз Мәліктің баласы Тимур отбасын құрып, қыз бала сүйді. Аллаға шүкір! Әрқашанда қасыңыздан табылатын немереңіз Анар бұл күні екі ұлдың анасы. Абыройлы шаңырақтың алтын қазығы.
Өткен 2019 жылдың желтоқсан айында ел Президентінің Жарлығымен Еділ Құдайбергенұлы Қазақстан Республикасының «Құрмет» орденімен марапатталды. Аллаға рахметімді айттым! Құдама: «Абыройың арта берсін! Ұрпағың арманыңа жеткізсін!» – деп тілек-батамды бердім. Құдам Еділ Құдайбергенұлын «Құрмет» орденімен еліміздің экономика, әлеуметтік және ғылым салаларына сіңірген еңбегі үшін марапаттады. Әрине, адам оқып, біліп үйренуі қажет. Білімсіз, ғылымсыз өнер табылмайды. Сол алған білім-өнерлерін елінің өркендеуіне жұмсауы тиіс. Сіздің балаларыңыз әр салада еліне өзіңіздей қалтқысыз қызмет етіп жүр. Ол сіздің арманыңыздың орындалғаны. Туған күніңізде сізге деген ілтипатымды жазғым келеді. Құдағи болсақ та туыстан артық сыйластық. Сізді әпке дегім келетін де тұратын. Мүмкін, біздің арамыздағы сыйластық басқаларға да үлгі болар. Көңіл қалыспай аралас-құралас болғанға не жетсін!
Бұл жазған сағынышқа толы ойларым бір әулеттің алтын діңгегі болған әпкем Гүлжан Сәдуақасқызына арналады. Сіздің асыл бейнеңізді осылайша бір табан өзіме жақындата түсемін, аяулы әпке!
Мәңгі бақи жадымдасың! Жаның жаннатта, иманың жолдас болсын!
Құдаңыз Еслямбек Бекпайұлы
Нұр-Сұлтан қаласы
