Мен әл-Фараби атындағы Қазақ ұлттық университеті шығыстану факультетінің Қиыр Шығыс кафедрасында «Аударма ісі» мамандығы бойынша корей тілін оқып жатқан студенттердің бірімін. Университетіміз бізге академиялық мобильдік жобасы арқылы шетелде білімімізді шыңдап, тереңдетуге мүмкіндік берді. Соны пайдаланған мен үшінші курстың бірінші семестрінде Кореяға оқуға бардым. Бұрындары туған жерден тым алыстап көрмегендіктен алғашында қобалжығанымды жасыра алмаймын. Бірақ та Инчхон қаласының әуежайынан түсе салып, өзіміз осыған дейін тек телехикаялардан тамашалап, тамсанған Кореяға келгенімізді білгенде көңілдегі алаң тарқап, уайымымыз ұмытылып кетті.
Біз барған оқу орны – Хангук шет тілдер университеті. Білім ордасының екі бірдей студенттер қалашығы бар. Біреуі Сеулде, екіншісі Йонъин деген қалада орналасқан. Біз барған Йонъиндегі қалашықтың аумағы аса үлкен әрі тауда орналасқан.
Мұндағы оқу үрдісі біздікінен мүлдем өзгеше. Сабақ кестесін өзің құрасың. Бұрындары сабақ кестесін құрып көрмегендіктен басында қиналғанымыз рас. Себебі, сабаққа қатыса алатын студенттердің саны шектеулі болады екен. Егер де өзіңе қажет пәнді игере алмасаң, профессорларды іздеп тауып, олардан сабаққа қатысуға рұқсат қағазын алуың керек. Бұл біз кездескен бірінші қиындық болды. Бірақ шетелдік болған соң бізге басқа мұғалімдер көмектесіп, мәселемізді мезгілінде шеше алдық.
Университетте мамандығымыз бойынша бес сабақ оқыдық. Әр сабақ ерекше, бір-біріне ұқсамайды және өзіндік қиындықтары да бар. Әр оқытушының сабақ өткізу тәсілі де әртүрлі. Емтихандар да сабаққа байланысты өзгеше өтеді. Мысалы, кейбір сабақтар ауызша, кейбірі жазбаша болады. Бір қызығы, бағаңды айтпайды. Яғни, барлық бағаны семестр біткен соң ғана ғаламторға салады. «Неге?» деп сұрап едік, «студенттер босқа уайымдамауы үшін» деп жауап берді. Бұл жақсы ма, жаман ба, өзіміз де әлі күнге түсіне алмадық. Корея университеттерінің бір ерекшелігі – көп сабақта кино көрсетеді. Бір семестрде бір сағатты киноға арнайды. Солай үш сабақта кино көріп, одан кейін оны бірге талқылау өте ұнады.
Сабақтарға қарағанда үй тапсырмасы айтарлықтай көп болды. Университеттік сабақтардан басқа таңертеңнен түске дейін тіл дамыту курстары өтті. Соның арқасында корей тілін меңгеру деңгейіміз арта түсті.
Университеттегі шетелдік студенттер үшін жұмыс істейтін “International Student Organization” атты ұйым көп көмектесті. Ай сайын әртүрлі іс-шара ұйымдастырды. Мысалы, Каннын және Гапен деген қалаларға, Кореяның басқа да көрнекті жерлеріне апарды. Қыркүйек айында топқа бөлді. Әр топта екі-үш жергілікті студенттен болды. Олармен жақсы дос болып кеттік.
Төрт ай аз уақыт болғанымен шетелдегі студенттік өмірді көріп, өзіміз үшін мол тәжірибе жинап қайттық. Корей тілін меңгеруіміз барынша жақсарып, сол елдің мәдениетімен, тыныс-тіршілігімен танысуға мүмкіндік алдық. Басқа ортаның, өзгеше талаптың өмірге деген көзқарасыңды кеңейтетініне кепілдік бере аламын. Жаңалықты ешқашан жатсынбаңыздар.
Аружан СЕРІКҚАН,
әл-Фараби атындағы ҚазҰУ шығыстану факультетінің 3-курс студенті,
Ақерке АБАҒАН,
ғылыми жетекшісі,
әл-Фараби атындағы ҚазҰУ Қиыр Шығыс кафедрасының аға оқытушысы, PhD
