Талғар ауданына іссапармен келген Алматы облысы әкімінің орынбасары Ақан Әбдуәлиев өңірдің әлеуметтік нысандарын аралап, атқарылып жатқан жұмыс жайымен танысты.
Ақан Жылқышыбайұлы іссапарын Гүлдала ауылындағы №21 мектептен бастады. Ірі мегаполиспен іргелес ауылдағы мектептің жайы мүлдем сын көтермейді. 1967 жылы 900 балаға арнап салынған білім ошағы күрделі жөндеуден өтпеген. Тозығы жеткен мектептің жай-күйін айтудан 7 жыл бойы жалықпаған мектеп директоры Қуан Айтбаев шыдамның да шегі барын жасырмады. Тиісті орындарға сан мәрте тапсырыс бергенімен еш нәтиже болмаған.
– 900 орындық мектепте өткен жылы 2000-ға жуық бала үш ауысыммен оқыды. Жалпы 200 қызметкер бар. Мектепте екі мәрте өрт шығу қаупі туындады. Мектептің материалдық-техникалық базасы өте ескірген, электр желісінің 80 пайызы істен шыққан, шатырынан су ағып тұрады. Кәріз жүйесі мүлдем істемейді. Дәретхана сыртта. Санитарлық-тазалық талаптары сақталмаған. Кабинет жетіспеушілігіне байланысты дәліздерді бөліп, қосымша сыныптар салынды, – деп мектеп директоры Қуан Айтбаев ащы ақиқатты еш бүкпесіз жайып салды.
– Алматымен іргелес ауылдың мектебі осындай болса, басқаларға не жорық?! Мектептің осындай мүшкіл халде екенін көре тұра неге үнсіз отырсыздар? – деген облыс әкімінің орынбасары саланың жауаптыларды сынға алды. Сонымен қатар, мектепті күрделі жөндеуден өткізуге тапсырыс беріп, сыннан қорытынды шығару қажеттігін тапсырды.
Тұрғындар саны жылдан-жылға өсіп келе жатқан Гүлдала ауылына қосымша жаңадан тағы бір мектеп салу қажеттігі көрініп тұр. Онсыз шиеленіскен мәселенің түйінін тарқату мүмкін еместігі ашық айтылды.
Талғар қаласындағы №4 орта мектептің жағдайы сын көтермейтін ғимаратына биыл күрделі жөндеу жұмыстарының жүргізілетіндігі туралы жағымды жаңалық ата-аналар мен ұстаздарды, оқушыларды қатты қуантқан еді. Алайда…
Ақан Жылқышыбайұлы тамыз айының басталуына санаулы күндер қалғанына қарамастан жасалып жатқан құрылыс жұмыстарының мардымсыздығына реніш білдірді. Ең өкініштісі, едендері мен есік-терезелері түгел сүріліп, жаңартылатын мектепке кәріз құбырын жүргізу жоспарда мүлдем жоқ болып шықты. Яғни, су мен дәретхана құбырлары жоспарда қарастырылмаған. Ал бұған дейін дәл осы мәселелердің сан мәрте сөз болғанын ескермеген мердігер компания басшылығын Ақан Әбдуәлиев сын тезіне салды.
Аталған мектептің күрделі жөндеу жұмысына облыстық бюджеттен 216 млн. 245 мың теңге бөлініп, ашық конкурс нәтижесімен жеңімпаз деп танылған «Капстройгрупп» жауапкершілігі шектеулі серіктестігі осы жылдың 26 сәуірінде 194 млн. 621 мың теңгеге келісімшарт жасаған. Құрылыс-монтаж жұмысы тамыздың 20-сы күні аяқталуы тиіс. Бүгінге дейін игерілген қаражат – 101 млн. 52 мың теңге. Жұмыстың 45 пайызы ғана аяқталған. Құрылыс-монтаж жұмыстарын жасауға 57 жұмыскер тартылған. Бірақ құрылыс алаңындағы сылбырлық жұмыстың белгіленген уақытта аяқталатындығына күмән тудыратындай.
Білім ордаларынан кейін 2011 жылы пайдалануға берілген аудандық ауруханаға барған Ақан Жылқышыбайұлы денсаулық сақтау мекемесінің жағдайымен танысты.
Тағы бір олқылық «жедел жәрдем» бөлімшесінде орын алды. Бөлім меңгерушісі еңбек демалысына кеткенімен орнына міндетін атқарушының тағайындалмауы, сондай-ақ, жедел жәрдем көліктерінің жетіспеушілігі, диспетчер мамандардың тапшылығы мұнда да бірқатар проблемалардың барын білдірді. Мұны осы бөлімшенің жоғары дәрежелі дәрігері Айгүл Түңлікбаева айтты. Мысалы, 49 мың тұрғыны бар Талғар қаласына 6 «жедел жәрдем» машинасы бөлінген. Көліктердің жетіспеушілігінен тұрғындардың жиі шағымданатындығын да жасырып қалмады.
Аурухананы аралау барысында жас дәрігерлердің жай-күйіне де көңіл бөлген Ақан Жылқышыбайұлы кадр тапшылығын жою мақсатында жас мамандарға мемлекеттік бағдарламалар негізінде көмек көрсетіп, әлеуметтік жағдайларын жақсартуды назарға алуды тапсырды. Одан кейін облыс әкімінің орынбасары Талғар қаласындағы 1974 жылы іргесі қаланған №9 орта мектеп ғимаратының сын көтермес ахуалын көрді. Сондай-ақ, «Аяла» әлеуметтік қорғау ұйымында болып, сирек кездесетін ауыр диагнозбен жатқан науқас балалардың және ондағы қызметкерлердің әлеуметтік-тұрмыстық жағдайларын білді.
Сапар соңында Ақан Әбдуәлиев аудандық жұмыспен қамту орталығында болып, атаулы әлеуметтік көмек алушыларды жұмыспен қамтудың белсенді шараларына тарту және жұмысқа орналастыру, жаңа жұмыс орындарын ашу сынды мәселелер төңірегінде мекеме қызметкерлерімен ой бөлісті.
Осы орайда айтар болсақ, аталған мекемеге жыл басынан бері 5055 отбасы атаулы әлеуметтік көмек (АӘК) алуға өтініш білдірген. Оның ішінде көпбалалы отбасы – 3551. Бүгінде аталмыш көмекпен 4419 отбасы қамтылған.
Ұлбосын ИСАБЕК
Талғар ауданы
