Қант қызылшасын өсірудің озық технологиясы, егістікті жүйелі суару, тыңайтқыштарды тиімді пайдалану, егіс алқаптарының көлемін ұлғайту қант өндірісінің дамуына жол ашады. Мамандар қазір бұған айрықша назар аударып отыр. Осыған байланысты көктемгі егіс қарсаңында Күреңбел өңірінде қызылшашыларға арналған оқу семинары ұйымдастырылып, тәтті түбірден мол өнім алудың қыры мен сыры жайлы әңгіме қозғалды.
Талдыбұлақ ауылында өткен басқосуға облыстық ауыл- шаруашылығы басқармасы басшысының орынбасары Коюмчан Омаров, аудан әкімінің орынбасары Серікбай Қожахметов және сала қызметкерлері мен ауылшаруашылығы кәсіпорындарының, шаруа қожалықтарының басшылары қатысты.
Айта кетейік, биыл ауданда егілетін егістік көлемі 107 982 гектарды құрайды. Оның ішінде көкөніс, дәнді және майлы дақылдар мен қант қызылшасы бар. Былтыр күреңбелдіктер тәжірибе ретінде барлығы 100 гектар жерге тәтті түбірдің тұқымын егіп, одан мың жарым тоннадан аса өнім алған еді. Бағалы дақылды көптеп өсіруге болатынына көз жеткізген дала еңбеккерлері биыл да қант қызылшасын егуге бел буып, оған арналған егістіктің көлемін 300 гектарға ұлғайтып отыр. Күзде одан он мың тоннадан аса қант қызылшасы алынады деген жоспар бар.
Осыған байланысты аталған жиында қант қызылшасын өсірудің қыры мен сыры жайлы кеңінен әңгімеленіп, дәріс оқылды. Қант қызылшасын өсірудің агротехнологиясы жайында сарапшы Абулхайр Бексұлтанов жан-жақты айтып берді. Тәтті түбір өсірудің жаңа технологиялары, оның тиімділігі, мол өнім алу жолдары, өнімнің дұрыс өсіп-жетілуіне қолайлы жағдайлар жасау, талапқа сай күтіп-баптау, жерді өңдеу, топырақ құнарлылығын арттыру, агротехникалық тыңайтқыштар мен гербицидтерді және пестицидтерді дер кезінде беру және оның әдіс-тәсілдерін білу, зиянкестермен күрес жүргізу, өсімдіктерді қоректендіру, оларды әртүрлі аурулар мен арамшөптерден қорғау, жоғары өнім беретін сапалы тұқыммен қамтамасыз ету, ауыспалы егістік жүйесін сақтау, лизингке жаңа техника алу, жерді дұрыс дайындау тәсілін білу, тұқымның жер бетіне өніп шығуы үшін оларға қолайлы жағдайлар жасау секілді мәселелер жан-жақты айтылды.
Үкімет тарапынан көрсетіліп жатқан мемлекеттік қолдауларға да ден қойылды. Сала қызметкерлері де шаруалардың талап-тілектеріне құлақ асып, ұсыныстарын тыңдады. Дала еңбеккерлері көкейде жүрген сауалдары мен ой-пікірлерін ортаға салып, тәжірибелі мамандардың тұшымды жауаптарына қанықты. Биыл бірінші рет қызылша өсіруге ынта білдіріп отырған қожалық иелері аталған семинардан мол мағлұмат алып, өздеріне қажеттілерін қағаздарына түртіп алды.
Ендігі кезекте шаруалар оқып, үйренгендерін егістік алқаптарына қолданамыз деп отыр. Сол себепті ауылдықтар бұл басқосудың маңызы мен пайдасының ұшан-теңіз екенін айтып қуануда. Күреңбелдіктердің басым бөлігі картоп өсірумен айналысады. Олар биыл екі мыңнан аса гектарға осы дақыл түрін отырғызбақ. Осы ретте жиында картоптан мол өнім алудың мүмкіндіктері де қарастырылды.
Айгүл БАЙБОСЫНОВА.
