Қаратал ауданына қарасты Ұмтыл ауылында ауызсумен жабдықтау жүйесін қайта жаңғырту және құрылыс жұмыстары басталмақ. Аталған жобаға республикалық және жергілікті бюджеттен 273 млн. теңге көлемінде қаражат бөлінген. Жобаның бас мердігері «Гүлім және компаниясы» ЖШС.
Қазіргі уақытта нысанда дайындық жұмыстары жүргізілуде. Құрылыс материалдары, темірбетон мен құбырлар жеткізіліп жатыр. Ауылішілік су құбыры желілерінің жалпы ұзындығы 3 км. 100 м., ал су тарту желілерінің ұзындығы 800 м. болады деп жоспарланған.
Биіктігі 25 метр, сыйымдылығы 50 м3 болатын су мұнарасы мен трансформаторлық қосалқы стансы салу көзделген. Бүгінде 115 метр тереңдіктегі ұңғыманы бұрғылау жұмыстары аяқталған. Құрылыс-монтаж жұмыстарының алғашқы кезеңі қаржыландырудың кешіктірілуіне байланысты мердігер компанияның өз қаражаты есебінен басталып отыр.
Мердігер компанияның директоры Саяқхан Нүкебаев бұл іс көп кешікпей толық аяқталатынын айтты.
– Осы жұмысты 15 маман атқарады. Егер барлық жағдай қолайлы болса, бар болғаны екі айдың ішінде ауылға таза ауызсуды кіргізіп береміз, – деп уәде етті.
Ұмтылдықтар үшін бұл көптен күткен қуаныш. Алдағы уақытта ауыл тұрғындары үшін ауызсу мәселесі біржола шешіліп, тұрмыс сапасы едәуір жақсара түспек.
Жобаның басталуы – тек құрылыс жұмыстары емес, ауыл халқы үшін үміттің жандануы. Ауыл тұрғыны Әсет Мұхамедқалиұлы:
– Бұл жаңалықты естігелі бері көңіліміз көтеріліп жүр. Судың жоқтығы біз үшін өте өзекті мәселе еді. Жазда бақша суару қиын. Қыста қар ерітіп отырмыз. Енді нақты жұмыс басталады. Бұрын-соңды ауылда мұндай құрылыс болмаған еді, – деп өз пікірін білдірді. Қазіргі таңда мердігер компанияның берген уәдесіне
тұрғындар сенім артады. Ендеше, Ұмтыл ауылының үміті ақталады деп сенейік.
Санжар СҰЛТАНҒАЗЫ,
Қаратал ауданы
Суретті түсірген Дмитрий ЕРОФЕЕВ
