Шерзат Полаттың қазасына байланысты өтіп жатқан сот процесінде марқұмның әкесі Қаржаубай Нұрымовтан жауап алынды.
Дүкен мен сол күнгі оқиға
Сот отырысының түскі үзілістен кейінгі бөлігінде Қаржаубай Нұрымов дүкенді қосымша табыс үшін ашқанын айтып, сол түнде болған жағдайды егжей-тегжейлі баяндады:
«Қазанның 3-інен 4-іне қараған түнде, сағат 21:00–22:00 шамасында дүкенге келдім. Дархан Әскентай келіп, екеуіміз әңгімелестік. Қайшылық болмады. Кейін 1-2 адам келіп, дүкен туралы сұрады. Дархан сыра сұрады, мен кеш болғанын айтып сатпадым. Бірақ ол қоймағасын бердім. Ақша аударым арқылы төленді. Мас күйде екенін байқадым – сөйлескенде ішімдіктің иісі шықты», – деді ол.
Қақтығыс сәті
Қаржаубай Нұрымовтың сөзінше, Шерзат қуаттағышын алуға келгенде, Дархан дүкенге қайта кіріп, дөрекі сөйлей бастаған.
«Телефонын қуаттауға сұрады, мен қосып бердім. Сосын екеуі сыртқа шықты. Терезе ашық тұрған, дауыс көтеріп сөйлесіп жатқанын естідім. Шыққанымда балам соғып жіберді. Екеуін ажыратып, балама ескерту жасадым. Дарханнан кешірім сұрап, ауруханаға апаруға, өтемақы төлеуге дайын екенімді айттым. Бірақ ол «кешірмеймін, балаларды шақырамын» деді», – деді Нұрымов.
Татуластыру әрекеттері
Қаржаубай Нұрымов бірнеше рет кешірім сұрап, оқиғаны ушықтырмауға тырысқанын жеткізді. Бірақ Дархан Әскентай «балаң жауап береді» деп кетіп қалған. Оқиғаның арты қайғылы жағдайға ұласқан.
Нұрымов сол сәтте әйелі мен інісіне хабарласып, жағдайды баяндағанын айтты.
«Жетісу-Ақпарат»
Коллаж: ulysmedia.kz
