Бұл туралы 7-su.kz ақпараттық порталы Dalanews.kz-ке сілтеме жасап хабарлайды.
Халық қалаулысының айтуынша, Ұлттық статистика бюросы 2025 жылдың бірінші тоқсанында жұмыссыздық деңгейі 4,6 пайызды құрайды деп көрсеткен. Бұл көрсеткішке сәйкес, елде 451 515 азамат жұмыссыз ретінде тіркелген.
– Бұған кім сенеді? Әр қалада жұмыс іздеп, «жетім бұрышын» торуылдайтын азаматтарды, дипломы барымен жұмыс таппай жүрген жас мамандарды күнделікті көріп жүрміз, – деді депутат.
Сәрсенғалиевтің мәліметінше, 2025 жылғы 16 мамырда жарияланған ресми дерекке сәйкес, Қазақстан халқының жалпы саны – 20 261 486 адам. Соның ішінде 11 496 447 адам еңбекке қабілетті саналады.
– Алайда елімізде зейнетақы жинағына бір тиын да аударылмаған және әлеуметтік аударым жасалмаған азаматтардың саны – 5 244 664. Бұл дегеніміз – еңбекке қабілетті халықтың жартысына жуығының ресми түрде жұмысы жоқ деген сөз. Мұндай жағдайда 4,6 пайыз деген көрсеткіш шындыққа жанаспайды, – деді ол.
«Жұмыссыздықпен күрес бағдарламалары тиімді жүзеге аспай жатыр»
Депутаттың айтуынша, жалған мәлімет беру салдарынан халықты жұмыспен қамтуға бағытталған бағдарламалар шын мәнінде тиімсіз іске асуда. Ол Жоғары аудиторлық палатаның есебіне сүйене отырып, 2024 жылдың 10 айында халықты жұмыспен қамтуға бағытталған 6 субсидиялық бағдарламаға 180 031 адамның қатысқанын айтты. Алайда олардың тек 26 194-і ғана тұрақты жұмысқа орналасқан.
Сонымен қатар Сәрсенғалиев 2024 жылы «Жастар практикасы» бағдарламасына 33 300 қазақстандық жас қатысқанын атап өтті. Бағдарлама аясында әр қатысушыға ай сайын 117 960 теңге көлемінде төлем жасалған. Соған қарамастан, тек 7 400 жас тұрақты жұмысқа орналасқан.
– Қазір елімізде 5,7 миллион жас бар, соның 3,7 миллионы еңбекке қабілетті. Еңбек министрлігі 2024 жылы 236 037 жасты жұмыспен қамтыдық деп есеп беріп отыр. Алайда зейнетақы қорына аударым жасаған жастар саны – 203 607. Сонда қалған 33 мың жастың төлемі қайда? Олар шын мәнінде жұмысқа тұрды ма, жоқ па? Әлде жалған статистиканың құрбаны болды ма? – деп сауал қойды депутат.
Нартай Сәрсенғалиев аталған мәселелерді шешу үшін ең алдымен ресми статистикадағы алшақтықтарды жойып, есептің шынайылығын қамтамасыз ету қажет екенін атап өтті.
