Аудандық аумақтық инспекциясының басшысы Азамат Ақылбековтың айтуынша, өңірге қарасты Жоламан, Қарашоқы, Сарыбастау, Қызылжар, Шанханай, Басши, Сарыбұлақ ауылдық округтерінде аса қауіпті, үйірлі «Итальяндық прус» және саяқ шегірткелердің мүлде күтпеген, бұрын болмаған жерлерінен, егістік айналасынан жаппай шығып, егістік пен жайылым, шабындық алқаптарға қауіп төндіруде. Үйірлі шегірткеге қарсы химиялық өңдеу жұмыстары республикалық бюджет есебінен жүргізілсе, саяқ шегірткеге қарсы өңдеу облыстық бюджет еебінен жүзеге асырылады. Мұның сыртында, республикалық бюджет есебінен аудан бойынша жыл бойы 118 мың гектар жерге зиянкестердің таралу аумақтары анықталады. Биыл Итальяндық прусқа қарсы жер үсті техникасымен – 350, авиациямен – 1150, саяқ шегірткеге қарсы – 1206 гектар, яғни 2706 гектар жерді химиялық өңдеу жоспарланған. Бүгінде бұл жұмыстар толық аяқталуға таяды.
Ауданда туындаған қиын жағдайға байланысты, облыс әкімдігі мен ҚР АШМ АӨК МИК Жетісу облыстық аумақтық инспекциясынан көмек сұралған. Республикалық және облыстың қосымша бөлген техника және өңдеу көлемдерінің арқасында жоспарланған жер көлемінен артық алқап өңделуде. Мамыр айының ортасынан басталған бұл жұмыстарға тұрақты түрде 5 жер үсті бүріккіш техникалары және шұғыл қажет жағдайда 1авиация бүріккіші жұмылдырылуда. Жалпы, ауданда қалыптасқан жағдай облыс басшылары мен Жетісу аумақтық инспекциясының тікелей бақылауында.
Айгүл Байжұмақызы
