Құрбан айт қарсаңында Қазақстан мұсылмандары діни басқармасы (ҚМДБ) жалған құрбандық платформаларынан сақ болуға үндеп, халыққа ресми сайтты пайдалануға кеңес берді, деп хабарлайды 7-su.kz ақпараттық порталы.
ҚМДБ құрбан шалу рәсімін жеңілдету және әділ ұйымдастыру мақсатында qurban.muftyat.kz ресми онлайн платформасын іске қосқан. Аталған сайт арқылы кез келген азамат құрбандық малының түрін таңдап, ақшаны қауіпсіз әрі сенімді түрде аудара алады.
– «Құрбан шалу рәсімін оңтайландыру мақсатында қолға алынған бастаманы кейбір алаяқтар теріс пайдаланып, халықты адастыруы мүмкін. Белгісіз тұлғалар мен ұйымдар жалған сайттар ашып, азаматтардың қаражатын басқа мақсаттарға бағыттап кету қаупі бар. Сондықтан баршаңызды абай болуға шақырамыз», – делінген ҚМДБ ресми хабарламасында.
Діни басқарма тек ресми әрі сенімді платформа арқылы ғана құрбандық шалуға кеңес береді. Күмәнді сайттар мен бейтаныс адамдардың ұсыныстарына сенбеу – қаражатыңыз бен ниетіңіздің қауіпсіздігін қамтамасыз етудің ең басты жолы.
– «Алла Тағала баршаңыздың құрбандықтарыңызды қабыл етіп, ізгі ниеттеріңізді арттырсын!», – деп түйінделген ҚМДБ мәлімдемесі.
