Бұл туралы 7-su.kz aқпараттық порталы Liter.kz сайтына сілтеме жасап хабарлайды.
Қазақстанда мекенжай бойынша тіркеу не үшін маңызды?
Қазақстанда тұрғылықты мекенжай бойынша тіркелу — міндетті талап. Бұл:
-
көші-қон қызметі,
-
құқық қорғау органдары,
-
әлеуметтік және медициналық қызмет көрсету жүйелері үшін аса маңызды.
Тіркеусіз (пропискасыз):
-
Баланы балабақшаға немесе мектепке орналастыру мүмкін емес;
-
Поликлиникаға тіркелу қиын;
-
Мемлекеттік тұрғын үй бағдарламаларына қатысуға, тұрғын үй кезегіне тұруға болмайды.
Пәтер сатушысы міндетті түрде тіркеуден шығуы керек пе?
Жоқ, пәтер не үй сату кезінде арнайы тіркеуден шығудың қажеті жоқ. Өйткені жаңа мекенжай бойынша тіркелген кезде бұрынғы тіркеу автоматты түрде жойылады.
Алайда жаңа мекенжай бойынша тіркелуді кейінге қалдыруға болмайды. Заң бойынша адам жаңа жерге көшкен соң 30 күн ішінде тіркелуі тиіс. Бұл тіркеу міндетті түрде фактілік тұрып жатқан мекенжайы бойынша жүргізілуі керек.
Ескерту: Егер азамат тұрақты түрде шетелге көшіп жатса, онда ХҚКО-дан (ЦОН) арнайы «кету парағын» рәсімдеуі қажет.
Жаңа пәтер иесі не істеуі керек?
Пәтерді сатып алғаннан кейін жаңа меншік иесі сол пәтерде бұрын тіркеуде болған барлық азаматтарды — соның ішінде бұрынғы иелерін де — тіркеуден шығара алады. Бұл үшін:
-
Сату-сатып алу шарты тіркелгеннен кейін,
-
Бұрынғы тұрғындардың келісімінсіз тіркеуден шығару рәсімін жүзеге асыруға болады.
Неліктен бұл маңызды?
Егер пәтерде іс жүзінде тұрмайтын адамдар тіркеуде қала берсе, бұл фиктивті тіркеу ретінде бағаланып, меншік иесіне айыппұл салынуы мүмкін.
2025 жылғы тіркеу тәртібін бұзғаны үшін айыппұл мөлшері
Сатушы үшін:
Егер адам жаңа мекенжайға 30 күн ішінде тіркелмесе:
-
7 АЕК (27 524 теңге) көлемінде айыппұл салынады;
-
Егер бұзушылық жыл ішінде қайталанса — 13 АЕК (51 116 теңге).
Сатып алушы үшін:
Егер оның меншігіндегі пәтерде іс жүзінде тұрмайтын адамдар тіркеуде болса:
-
10 АЕК (39 320 теңге) көлемінде айыппұл төлеуге міндеттеледі.
Пәтерде кімнің тіркеуде тұрғанын қалай білуге болады?
-
eGov.kz электронды үкімет порталында;
-
eGov Mobile мобильді қосымшасы арқылы көруге болады.
