Мәжіліс депутаты Жұлдыз Сүлейменованың техникалық қызметкерлердің жалақысын көтеруге қатысты депутаттық сауалына жауап берген Премьер-министрдің орынбасары Ермек Көшербаев Үкімет тарапынан бірқатар нақты шаралар қабылданып жатқанын хабарлады.
Ресми мәліметке сәйкес, техникалық жұмыскерлер – еден жуушы, жүргізуші, электрик, күзетші, вахтер сияқты азаматтық қызметшілердің жалақысы 2022 жылдан бастап жыл сайын орта есеппен 20%-ға өсіп отыр. Нәтижесінде 2025 жылға қарай олардың жалақысы 2 есеге ұлғайтылған.
Мемлекеттік мекемелер мен қазыналық кәсіпорындардағы техникалық қызметкерлерге еңбекақы төлеу жүйесі бірыңғай. Сондықтан жалақыны арттыру барлық салада кешенді түрде қаралуы тиіс. Себебі бір саладағы жалақы өсімі өзге салаларда наразылық тудыруы мүмкін, — делінген Көшербаевтың жауабында.
Үкімет қаулысына сәйкес, 2022 жылдан бастап жергілікті атқарушы органдарға жергілікті бюджет есебінен қаржыландырылатын ұйымдарда жұмыс істейтін азаматтық қызметшілерге ынталандыру үстемеақыларын белгілеу құқығы берілген. Бұл шешімді мәслихаттың келісімімен жергілікті атқарушы орган қабылдайды.
2024 жылы осындай үстемақыларды 10 өңірдің әкімдігі бекітті. Олар:
-
Астана
-
Алматы
-
Шымкент
-
Жамбыл облысы
-
Қарағанды облысы
-
Түркістан облысы
-
Жетісу облысы
-
Алматы облысы
-
Солтүстік Қазақстан облысы
-
Қостанай облысы
Осылайша, өңірлік әкімдіктердің қолдауымен азаматтық қызметшілердің жалақысын арттыруға нақты мүмкіндік жасалды.
«Жетісу-Ақпарат»
