Жетісу облысында бұқаралық спортты дамытуға бағытталған «J LEAGUE» жобасы өз мәресіне жетті, — деп хабарлайды Жетісу облысы әкімінің баспасөз қызметі. Ауқымды спорттық бастама 2025 жылдың 19 сәуірінде Талдықорған қаласындағы «Жастар» спорт сарайында ресми түрде бастау алып, облыс тұрғындары арасында ерекше қолдауға ие болды.
Жобаның негізгі мақсаты – жасөспірімдер арасында салауатты өмір салтын насихаттау, зиянды әдеттерден арылуға үндеу тастау және спортқа деген қызығушылықты арттыру.
«J LEAGUE» жобасына Жетісу облысының барлық елді мекендерінен 887 команда, 9000-ға жуық жасөспірім қатысты. Яғни, футбол бойынша 556, волейболдан 177, баскетболдан 154 команда бақ сынасты. Ақтық сайыстарға 150 командадан 1500-ден астам қатысушы жолдама алды.
Финал нәтижесіне сәйкес, «Былғары доп», «Алтын доп», «Шұбар доп» кезеңдерінің жеңімпаздары анықталып, оларға жазғы сауықтыру лагерлеріне жолдама, спорттық киімдер және 3000-ға жуық доптар табысталды. Ал жаттықтырушыларға ақшалай сыйақылар берілді. 9000-ға жуық бала тұрақты түрде спортпен шұғылданып, 250-ден астам жаттықтырушы әдістемелік көмек алды. Осы жобаның арқасында ауылдық жерлердегі балалардың спортқа қатысу деңгейі 42%-ға артты.
Қоғам тарапынан оң баға алған бұл бастама жалғасын тауып, 2025 жылдың төртінші тоқсанынан бастап «J LEAGUE 2.0» жобасы іске асырылатын болады.
