Мәжіліс депутаты Ринат Зайыт халықтың азық-түлікті қарыз дәптерге жаздырып алуына қатысты өз ойын білдірді. Оның айтуынша, бұл — бұрыннан келе жатқан мәселе және қазір тек жиілей түскен.
«Азық-түлікке өзім бармаймын, келіншегім барады. Кейде өзім де ақша қажет болып қалғанда қарызға аламын. Бұл — бүгін ғана пайда болған жағдай емес. Былтыр да халқымыздың Kaspi Red-пен азық-түлік алып жүргенін айтқан болатынмын. Қазір бұл жағдай ушығып кетті деп ойлаймын», — деді депутат.
Сонымен қатар, ол елдегі әлеуметтік жағдайға байланысты таңғалысын да жеткізді:
«Мен тіпті тамағына әрең жететін халықтың киімді қалай сатып алып жүргеніне таңғаламын», — дейді Зайыт.
Журналистің “Бұл жағдай халықтың қаржылық сауатсыздығынан ба, әлде табыстың аздығынан ба?” деген сұрағына депутат:
«Дүкеннен нан алу үшін ешқандай қаржылық сауаттылық қажет емес. Ал егер нан бағасы күн сайын өсіп жатса, бұл — халықтың емес, жүйенің кінәсі», — деп жауап берді.
Сөз соңында Ринат Зайыт халықтың лайықты өмір сүруі үшін жалақының кем дегенде 300 мың теңге болуы қажет екенін айтты.
