Күнделікті күйбең тіршілікте қала тұрғындары үшін қарапайым серуеннің өзі қауіпке айналады. Талдықорған қаласындағы жаяу жүргіншілерге арналған инфрақұрылымның көрінісі тек қолайсыздық емес, тікелей адам өміріне қауіп төндіретін мәселе.
Облыс орталығындағы Шоқан Уәлиханов көшесімен отбасымызбен серуендеп келе жатып, осы жағдайға өзіміз куә болдық. Бір баламызды арбаға отырғызып, біреуін қолымыздан жетелеп келе жатқан едік. Гагарин көшесінен Алдабергенов көшесіне қарай барар тұста аяқ астынан тротуар бітіп қалды. Алдымен таңдандық, сосын амалсыздан көлік жолына түсіп, жолдың арғы бетіне өтуге тура келді. Жол жиегінде жаяу жүргінші өткелі болғанымен, асфальттегі белгі өшіп кеткен, ал жол белгісін жапырақ басып, жүргізушіге де, жүргіншіге де анық көрінбейді.
Көліктің азайған сәтін пайдаланып, жылдам өтіп кеттік. Алайда алдан тағы кедергі шықты. Көп қабатты үйдің жанына орналасқан газ құю станциясы тура жолдың жигеніде тұр. Тағы да көлік жүретін жолға түсуге тура келді. (Видеоға назар аударсаңыз)
Жолдың бұралаң келетін тұсынан өту, әсіресе, түнде өте қиын. Уәлиханов көшесі, 195-үйдің Айна есімді тұрғыны бұл маңда балабақша орналасқанын айтады. Күнде ата-аналар балаларын жетектеп дәл осы жермен өтеді.
— Бұл жақтан күндіз өтудің өзі қорқынышты. Түнде тіпті, қиын. Осы жерге жарық шамдарын орнату керек. Өйткені тура жанымызда балабақша бар. Көбі осы жерден өтеді, — дейді Айна.
Мәселе тек бір көше немесе бір өткелмен шектелмейді. Қаланың өзге аймақтарында да жаяу жүргіншілер мен велосипед мінгендерге арналған жолдардың жоқтығы немесе дәл осылай бітіп қалуы байқалады. Әсіресе, ерекше қажеттілігі бар азаматтар үшін бұл мәселе екі есе қиын.
Қазақстан Конституциясы адамның өмірі мен қауіпсіздігін ең жоғары құндылық ретінде қарастырған. Сондықтан жолды түбегейлі қайта салу қиын болса да, тым болмаса жаяу жүргінші өткелдерін айқын етіп сызып, жарықтандырып, белгісін көрінетіндей етіп қоюға болар еді. Бұл – тек ыңғайлылық үшін емес, өмір қауіпсіздігі үшін қажет шешім.
Қала дамығысы келсе, алдымен оның әрбір тұрғыны өз көшесінде өзін қауіпсіз сезінуі тиіс. Бұл – өркениетті қаланың белгісі.
Мәулен Әнербай
