Мәжіліс депутаты Бақытжан Базарбек мемлекеттік басқару жүйесін оңтайландыру үшін жасанды интеллектіні енгізуді ұсынды. Бұл туралы 7-SU.KZ ақпараттық порталы хабарлайды.
Депутаттың айтуынша, цифрлық технологияларды енгізу арқылы мемлекеттік қызметкерлер санын және министрліктерді қысқартуға мүмкіндік бар. Бұл шаралар елдің қарыздық жүктемесін азайтып, бюджет шығыстарын оңтайландыруға септігін тигізеді.
«Біз мемлекеттік қызметті цифрландыру аясында 2026 жылдан бастап біртіндеп мемлекеттік аппаратты қысқартуымыз керек. Одан үкімет те, барлығы қорқады. Бірақ егер мемлекет шығыстарын қысқартпасақ, қарыз қыспаққа алады», – деді депутат мәжіліс кулуарында.
Оның пікірінше, шығындарды азайту үшін ұлттық компаниялар мен министрліктерді біріктіру қажет.
«Мысалы, ‘Самұрық-Қазына’ әл-ауқат қоры мен ‘Бәйтерек’ ұлттық компаниясының әкімшілік аппараттарын қысқарту керек. Сонымен қатар кейбір министрліктерді біріктіруге болады. Халық саны аз елге осыншама министрлік қажет емес», – деді ол.
Біріктіруге болатын министрліктер мысалы ретінде депутат келесілерді атады:
-
Су ресурстары және экология министрлігін;
-
Қаржы және ұлттық экономика министрлігін;
-
Индустрия және құрылыс министрлігін.
Сондай-ақ, әр министрдің 5-6 орынбасарының орнына 2 ғана орынбасар қалдыру қажет екенін алға тартты.
«Басқаша айтқанда, шығындарды азайтуымыз керек», – деді Бақытжан Базарбек.
