Қазақстан Республикасы Ұлттық қауіпсіздік комитеті Шекара қызметінің Жетісу облысы бойынша департаментіне қарасты Алакөл ауданы басқармасында мерзімді әскери қызметін өтеп жатқан қатардағы жауынгер Қанатұлы Нұрберген Отан алдындағы борышын үлкен жауапкершілікпен атқаруда.
Қанатұлы Нұрберген 2005 жылы Жетісу облысының Жаркент қаласында дүниеге келген. Бала күнінен ерлікке, отансүйгіштікке баулынған ол шекара қызметінің маңызын отбасынан көріп өсті. Оның әкесі — Зайсан шекара отрядының қатарында 1993-1995 жылдары әскери борышын өтеген азамат. Осы өнегенің арқасында Нұрберген де ел қорғау жолындағы жауынгерлік өмірге саналы түрде қадам басты.
2025 жылдың 6 наурызында Қазақстан Республикасының Қарулы Күштері қатарына шақырылып, қазіргі уақытта Жетісу облысы бойынша департаменттің Алакөл ауданы басқармасына қарасты шекара бөлімшесінде әскери міндетін мінсіз атқаруда.
Нұрберген арнайы орта білім алып, «Емдеу ісі» мамандығын меңгерген. Әскер қатарына шақырылғанға дейін аудандық емханада төрт ай бойы медицина қызметкері ретінде еңбек етіп, тұрғындарға сапалы медициналық көмек көрсетті. Бұл тәжірибе оны жауапкершілігі жоғары, төтенше жағдайда шұғыл әрі дұрыс шешім қабылдай алатын маман ретінде қалыптастырды.
Қатардағы жауынгер Қанатұлы Нұрберген шекара шебінде адал қызмет атқарып қана қоймай, өнер саласында да ерекше белсенділік танытуда. Ол — аудандық және облыстық деңгейде өткен ақындар айтысының бірнеше мәрте жүлдегері. Жас сарбаздың поэзияға деген ынтасы елге, жерге деген сүйіспеншілігін, ұлттық рух пен азаматтық жауапкершілігін айқын көрсетеді.
Отбасының жалғыз ұлы бола тұра, Нұрберген әскери борышын өтеуді азаматтық парызы деп біледі. Оның ерік-жігері мен отансүйгіштігі қатардағы жауынгерлер мен жастарға үлгі боларлық. Әрбір күнін тәртіппен өткізіп, жауынгерлік міндетін адал атқарып жүрген Нұрберген — бейбіт өмірді қорғаушы шынайы қаһарман.
