Дүниежүзілік денсаулық сақтау ұйымы (ДДСҰ) елдерді 2035 жылға дейін қантты сусындар, алкоголь және темекі бағасын кемінде 50%-ға көтеруге шақырды. Бұл қадам қант диабеті, жүрек-қан тамыр аурулары және онкологиялық аурулардан болатын өлімді азайтуға септігін тигізеді деп күтілуде, деп хабарлайды 7-su.kz ақпараттық порталы.
Жаңа бастама «3-тен 35-ке» деп аталады және зиянды өнімдерді тұтынуға қарсы күреске бағытталған. Бағдарламаның мақсаты — 10 жыл ішінде денсаулыққа зиянды өнімдерді азайтып, ұлттық денсаулық сақтау жүйелерін қаржыландыруды арттыру.
ДДСҰ дерегінше, аталған өнімдердің бағасын бір реттік 50%-ға көтеру алдағы 50 жылда 50 миллион адамның өмірін сақтап қалуға мүмкіндік береді.
«Денсаулық салығы — біздің қолымыздағы ең тиімді тетіктердің бірі. Ол зиянды өнімдерді тұтынуды азайтып, мемлекеттерге денсаулық сақтау, білім және әлеуметтік қорғау салаларына қосымша қаржы салуға жол ашады. Қазір әрекет ететін уақыт келді», — делінген ұйымның мәлімдемесінде.
Бастаманың тағы бір мақсаты — алдағы 10 жылда денсаулық сақтау саласын қолдауға 1 триллион доллар көлемінде қаражат жинау. ДДСҰ мәліметінше, соңғы онжылдықта 140-қа жуық мемлекет темекіге акциздік салықты көтеріп, нәтижесінде оның бағасы орта есеппен 50%-ға өсті.
Айта кетейік, 2024 жылғы шілдеде Ұлттық статистика бюросы елімізде темекі шегуге қатысты жыл сайынғы зерттеуінің қорытындысын жариялады. Зерттеу Астана, Алматы, Шымкент қалаларын және барлық өңірді қамтыды. Нәтижесінде, ересек халықтың 20,7%-ы темекі шегеді деген дерек тіркелді. 2023 жылы бұл көрсеткіш 19,4% болған.
