Жоғарғы сот алимент өндіріп алу тәртібіне қатысты нормативтік қаулысына өзгеріс енгізді. Бұл туралы 7-su.kz ақпараттық порталы хабарлайды.
Енді соттар алимент мөлшерін азайту туралы талапты қараған кезде, алимент төлеушінің қаржылық жағдайының нашарлауын міндетті түрде ескеретін болады. Мұндай шешімге бір азаматтың Жоғарғы сотқа шағымдануы себеп болды.
Сот талдау барысында қолданыстағы заңнамада қарама-қайшылық барын анықтаған. Бұған дейін соттар алимент мөлшерін азайтуға тыйым салатын нормативтік қаулыға сүйеніп келген. Ал “Неке (ерлі-зайыптылық) және отбасы туралы” кодексте керісінше, борышкердің материалдық жағдайының төмендеуі алимент мөлшерін азайтуға негіз болатыны жазылған. Осылайша, Жоғарғы сот өз қаулысындағы даулы тармақты алып тастап, Үкіметке алимент өндіріп алу механизмін жетілдіруді ұсынды.
— «Нормативтік қаулыда борышкердің материалдық және отбасылық жағдайының нашарлауы алимент мөлшерін азайтуға негіз бола алмайды деп көрсетілген. Алайда “Неке және отбасы туралы” кодексте материалдық жағдайының төмендеуі – алимент мөлшерін азайтуға негіз болады деп нақты айтылған. Осыған байланысты қаулыдағы қайшы норма алынып тасталды», — деп түсіндірді Жоғарғы сот аппаратының талдау және конституциялық өндіріс бөлімі меңгерушісінің орынбасары Амир Умаров.
Жоғарғы сот бұл шешім азаматтардың конституциялық құқықтарын қорғау және сот практикасында заң талаптарын біркелкі қолдану үшін қабылданғанын атап өтті.
