Жаз мезгілінде суға шомылу – тек сергітетін демалыс емес, сонымен қатар денсаулыққа да пайдалы іс. Алайда, суда ойнаудың да өз қауіптері бар екенін ұмытпау қажет. Әсіресе, шомылу маусымында қарапайым сақтық шараларын ұстанбаса, қайғылы жағдайлар орын алуы мүмкін. 7-su.kz ақпараттық поратлы суға түсуге шыққанда ескеруге тиіс негізгі кеңестерді ұсынады.
Тек рұқсат етілген орындарда шомылыңыз
Су айдындарына барғанда ең алдымен арнайы белгіленген, құтқарушылар кезекшілікте тұратын және суы тексерілген жағажайларды таңдаңыз. Рұқсат етілмеген немесе зерттелмеген су қоймаларында түбі батпақты, қауіпті өсімдіктері немесе су асты ағындары болуы мүмкін.
Балаларды қараусыз қалдырмаңыз
Балалар үшін су – үлкен қауіп көзі. Балалардың ересектердің қарауынсыз суға жақындауына жол бермеңіз. Қайда болса да, оларды көзден таса қылмай, қасында жүріңіз. Тіпті тайыз суда да қауіп туындауы ықтимал екенін есте сақтаңыз.
Алкогольден бас тартыңыз
Алкоголь ішіп алып суға түсу – ең қауіпті әрекеттердің бірі. Ол естің айқындығын жоғалтып, тепе-теңдік пен қозғалысты үйлестіру қабілетін төмендетеді. Қауіпсіздік үшін демалыс кезінде спирттік ішімдіктерден мүлде бас тартқан жөн.
Күннен қорғаныңыз
Ұзақ уақыт күн астында қалу күн өтуге, күйікке және сусыздануға әкелуі мүмкін. Сондықтан күннен қорғайтын крем жағыңыз, бас киім киіңіз, денеңізді тікелей күн сәулесінен қорғауға тырысыңыз. Ыстықта ұзақ шомылып, күнге қыздырынғаннан кейін міндетті түрде көлеңкеге шығып демалыңыз.
Денсаулық жағдайыңызды ескеріңіз
Жүрек-қан тамырлары немесе тыныс алу жүйесінде ақауы бар адамдарға суық суға бірден түсуге болмайды. Әсіресе денеңіз қызып тұрғанда суға бірден сүңгіп кетпей, біртіндеп суға үйреніп алыңыз.
Қауіпсіздікті ұмытпаңыз
- Жағажайда және суда орнатылған белгілерге назар аударыңыз.
- Қауіп төнген жағдайда қайда және қалай көмек шақыруға болатынын біліп алыңыз.
- Қатты толқындар, дауыл немесе найзағай кезінде суға түспеңіз.
- Жүзуді білмесеңіз, терең жерге бармаңыз және құтқару құралдарын пайдаланыңыз.
Құтқарушылардың талаптарына бағына біліңіз
Құтқарушылардың нұсқауларына және жағажайдағы ережелерге бағыну – әр демалушының міндеті. Олар тыйым салған кезде суға түспей, белгіленген аумақтан шықпау қауіпсіздік кепілі болады.
Жазғы демалысты есте қаларлық, көңілді әрі қауіпсіз ету – әрқайсымыздың қолымызда. Жоғарыда аталған кеңестерді сақтасаңыз, суға шомылу маусымы сіз бен отбасыңыз үшін қуаныш пен денсаулық әкеледі.
