«Талдықорған» газетінің алғашқы бас редакторы, Қазақстан Жазушылар одағының мүшесі, сатирик Тұрлыхан Кәрімге ескерткіш тақта орнатылды. Ескерткіш тақта қаламгердің 30 жылға жуық өзі тұрған үйдің қабырғасына ілінді. Салатанатты шара жазушының туған күніне орай ұйымдастырылды. Ол тірі болғанда биыл жетпіс жасқа толар еді.
Тұрлыхан Кәрім 1955 жылы Шығыс Қазақстан облысы, Тарбағатай ауданында дүниеге келген. 4 жасынан домбыраның құлағында ойнап, батырлар жырын жатқа білген екен. Қаламы қарымды журналист 1992 жылы 2 наурызда жарық көрген «Талдықорған» газетінің алғашқы бас редакторы болып тағайындалып, ақпарат саласында жемісті қызмет етеді. Кейіннен ұстаздық жолға бет бұрып, Заң академиясында, Жетісу университетінде мұғалім болып жұмыс істейді. Зейнетке аталған білім ошағынан шығады. Тұрлыхан Кәрімнің «Махаббат оты сөнбейді», «Ақшатаудан Алатауға дейін», «Еркек қалай күн көрер?», «Қаракөз» сынды 20-ға жуық авторлық кітабы бар. Дені сатиралық жанрда жазылған.
Сатира әлемінің саңылағы өзгелерден шыншылдығымен, батылдығымен, айрықша қолтаңбасымен ерекшеленді. Жазған мақалалары мен шығармалары ел арасында кеңінен таралып, қоғамда үлкен серпіліс тудырған. Оның әзіл-оспақ, қалжың тұрғысында жазылған туындылары әлі де елдің есінде.
– Тұрлыхан Кәрім жасынан сүйегіне сөз сіңген, өте қабылетті мықты азамат болды. Соның арқасында қазақтың көрнекті жазушысы, ысқақшысы, ірі журналисті дәрежесіне жетті. Енді, Тұрекеңмен біз университетте бірге оқыдық. Ол өте алғыр болатын. Есте сақтау зейін, қабілеті мықты еді. Облыстық «Октябрь туы» газетінде кезінде қызмет етті. Мықты корифейлерден үлгі алды. Сол үлгі, өнегесінің арқасында Талдықорған деген қалалық газетінің негізін қалады. Сол газетті ашты. Бүкіл журналистік қабілетін, тәжірибесін салып, сол газеттің үлкен деңгейге көтерілуіне ат салысты. Ол газет күні-бүгінге дейін шығып келе жатыр, – дейді ақын, журналист Әміре Әрін.
Ескерткіш тақтаның ашылу рәсіміне жазушының туған-туыстары, мен замандастары жиналды. Олар Тұрлыхан Кәрімнің шығармашылығы мен адами болмысы туралы естеліктер айтып, оның өнегелі өмір жолын еске алды. Салтанатты жиынға жазуының ұрпақтары да қатысты.
– Әкемнің өмірбойы аңсағаны Қазақстанның тәуелсіздігі болды. Соның ішінде тілге қатты жаны ашыды. Қандай бір жиындарда орысша сөйлеген емес. Нағыз ұлтжанды кісі еді. Бізді де осы ұлтты сүюге, елдің адал азаматы болуға баулыды. Әкеміздің есімін ұрпақ жадында жаңғыртуға күш салып жатқан, осы ескерткіш тақтаның ашылуына себепкер болған қалалық Ардагерлер ұйымына, Қазақтан жазушылар одағының Жетісу облысындағы филиалына үлкен алғыс айтамыз, – дейді қаламгердің ұлы Дәурен Тұрлыхан.
Тұрлыхан Кәрімнің есімі ел жадында мәңгі сақталатыны сөзсіз. Қаламгердің артына қалдырған сарқылмас мұрасын талайлаған ұрпақ азық етері анық.
Медет ЖҰМАБАЙ
