Спорттың сан салалы жолына енді түсіп, бағытын айқындап, келешекке көп үмітті арта еңбектеніп жатқан көкқанаттардың бастамасын көргенде сүйсінесің. Талдықорғанда Орталық бассейн жұмыс істегелі су спортындағы жетісулықтардың нәтижесі оң бағытқа бет алып, көш арасынан айқын көріне бастаған. Кейінгі жылдары еліміздегі су добының нәтижесі төмендегенімен балалардың арасында танымалдылыққа кеңінен ие болып, жарыстан жүлделі оралып жүр.
Жасөспірімдер арасындағы ел чемпионатының шешуші сәті. Былтыр күзде басталған чемпионат еліміздің әр қаласында өтті, енді жарысты Талдықорғанда қорытындыламақ. Оған себеп – бассейннің мүмкіндігі, талапқа сай құрал-жабдықтармен қамтамасыз етілуінде. Су добынан мемлекеттік жаттықтырушы Ерік Көпбергенов: «Талдықорғандағы финалдық ойындардың түгелі ютуб желісінде тікелей көрсетіліп жатыр. Осы спорт түрінен толық хабары бар азаматты арнайы шақыртып, комментаторлық міндетті жүктедік. Бұл жарыста көзге түскендер Азия чемпионатында ел намысын қорғайтын болады. Мықты ойыншылар бар, оларды тізімдеп алдық. Биылғы жарыстың жөні басқа. О баста «ақтық мәреге тек төрт команданың қатысуына мүмкіндік береміз бе?» дегенбіз, бәсекелестіктің күштілігінен Астана, Тараз, Семей, Талдықорған, Орал, Атырау қалаларынан алты команда қатысып отыр. Былтыр чемпионат тек үш айналымнан тұрса, биыл халықаралық жарыстардың ережелерін назарға алып, бес айналым жасадық. Жалпы биылғы чемпионатқа 12 команда қатысты», – дейді.
Су добынан 2012-2013 жылы дүниеге келгендер арасындағы Қазақстан чемпионатының жартылай финалында Тараз қаласының спортшылары Астанадан келгендерді 10:7, 10:8 есебімен жеңді. Ал Талдықорғанның балалары бірінші күні 11:6 есебімен Атыраудың ойыншыларынан басым түскенімен келесі күні 13:18 нәтижесімен жеңіліп, екі күннің көрсеткіші бойынша доп айырмасы есептеліп, тең түскендіктен пенальти сериясы финалисті анықтады. Бұл сында былтыр ІІ-орын алып, биыл нәтижені жақсартамыз деген талдықорғандықтар сүрініп, 4:5 есебімен жеңілді. Енді жетісулықтар қола медаль үшін сынға түседі. Ал финалда Астана мен Тараздың спортшылары чемпионды анықтайды.
– Әрине, біз ойлағандай болған жоқ. Жартылай финалдағы екінші ойындағы қателіктерден сабақ алып, қорытынды шығарамыз. Балалардың талабына, қызығушылығына ризамын. Алдағы уақытта еліміздің абыройын асқақтататын шеберлердің шығатындығына сенімдімін, – деді Талдықорған құрамасының бас бапкері Мади Болатов.
Серік ҚАНТАЙ
