Аралау барысында қала әкімі аталған аумақтардағы абаттандырылып жатқан үлердің жұмыс сапасына баса назар аударды. Сондай-ақ, ол құрылысқа жауапты мердігер мекеме басшыларына қауіпсіздікті сақтап, қолға алынған жұмыстардың сапасына баса мән беріп, уақытылы аяқтауды тапсырды.
Сала жауаптыларының сөзінше, бүгінде Жетісу облысының орталығындағы инфрақұрылыдарды жаңарту қала әкімінің тапсырмасына сай жоспарлы түрде жүзеге асырылып жатқан ауқымды жобалардың бірі. Жөндеу жұмыстары жүргізіліп жатқан бұл үйлердің басым бөлігі өткен ғасырдың 60-70 жылдары салынған. Осыған байланысты биылғы жылы Талдықорғандағы қайта жаңғырту жұмыстары аясында 59 аула абаттандырылып, 40-қа жуық көпқабатты тұрғын үйдің шатыры және 20 үйдің қасбеті жөндеуден өткізілмек.
– Қауіпсіздік бәрінен маңызды. Өйткені бұл адам өмірімен байланысты. Сол үшін құрылыс нысандарында жүмыс жасап жатқан жұмысшылардың бас амандығына баса мән беру қажет. Еңбеккерлерге берілген құрал-жабдықтармен қатар, арнайы киімдердің де болуы шарт. Қазір қаладағы қайта жаңғырту жұмыстары жүріп жатқан нысандар да барлық талаптар сақталуы тиіс. Сондықтан құрылыс алаңдарындағы әр іске салғырт қарауға болмайды, – деді шаһар басшысы Ернат Дүйсенбекұлы.
Талдықорған қаласы әкімдігінің баспасөз қызметінің мәліметінше, бүгінде қалада абаттандыру жұмыстары ауқымды. Мәселен, өткен жылы қаладағы «Ұлан» шағын аумағында 5 аула ретке келтірілсе, Еркін ауылында 2 аулаға жөндеу жұмыстары жүргізілген. Сонымен қатар, «Халық қатысатын бюджет» бағдарламасы аясында Батыс тұрғын алабындағы Жазиралы мен Ақындар көшелерінің қиылысында, сондай-ақ аймақтағы Ащыбұлақ, Алмалы, Үйтас және Көктем саяжайларында стрит-воркаут кешені мен балалар ойын алаңдары салынған. Мұндай жұмыстар биыл да жалғасып аймақта 59 аула ел игілігіне берілмек. Атап айтқанда, облыс орталығындағы «Жұлдыз» шағын ауданында 18 аула, «Жетісу» шағын ауданында 11 аула және «Ұлан» шағын ауданында 9 аула абаттандырылады. Сонымен қатар «Халық қатысатын бюджет» бағдарламасы аясында тағы 20 аулаға спорттық жаттығу және балалар ойын алаңдары салынбақ.
Айдын КӘЛІМХАН
