Алакөл ауданына қарасты Ақши ауылында «Спорт – діни экстремизм мен терроризмге қарсы» ұранымен дәстүрлі «Алакөл – 2025» облыстық жазғы спартакиадасы өз мәресіне жетті.
Облыс көлемінде өткен дәстүрлі спорттық шара бұқаралық спортты дамытуға, жастар арасында саламатты өмір салтын қалыптастырып, діни экс-тремизм мен терроризмнің алдын алуға, сондай-ақ, өңір туризмінің әлеуетін танытуға бағытталды.
Ақши ауылында екі күнге созылған спартакиадаға 400-ге жуық спортшы қатысты. Олар жағажай волейболы, шағын футбол, үстел теннисі, арқан тарту сынды спорт түрлері бойынша сынға түсті.
Айта кетсек, жарыстың басты ерекшелігі – әр жарыс табиғат аясында ұйымдастырылды. Сондықтан да қатысушылар үшін спартакиада тек жарыс қана емес, ерекше атмосфераға толы спорттық мерекеге айналды.
Жарыс қорытындысы бойынша Талдықорған қаласының командасы жеңімпаз атанды. Алакөл ауданының спортшылары ІІ орынға табан тіресе, үздік үштікті Кербұлақ ауданының командасы түйіндеді. Дәстүрлі спартакиада тұрақты түрде жалғаса бермек. Ұйымдастырушылар жыл сайын жарыстың ауқымын кеңейтіп, қолдауды да арттырмақ.
Алуа ОСПАНЖАН,
Дене шынықтыру және спорт басқармасының баспасөз хатшысы
