Астана қалалық сотында Перизат Қайрат пен оның анасы Ғайни Алашабаеваға қатысты қылмыстық іс бойынша тараптардың жарыссөзі өтті. Сот отырысында тергеу барысында алынған бірқатар жабық мәліметтер жария етілді, — деп хабарлайды 7-su.kz ақпараттық порталы.
Айыптау актісіне сәйкес, Перизат Қайрат пен Ғайни Алашабаева «BizBirgemiz Qazaqstan 2030» қайырымдылық қоры арқылы жиналған 559 миллион теңгені жымқырған. Бұл қаржы бастапқыда Палестина халқына гуманитарлық көмек көрсету мақсатында жиналған болатын.
Қаржы заңдастыру жолдары
Прокуратура өкілдерінің мәліметінше, жымқырылған қаражат Rebel Flowers гүл салонын сатып алу арқылы заңдастырылған. Айыптаушылар мұны ақшаны жылыстату әрекеті деп бағалап отыр.
Перизат Қайрат кінәсін мойындамады
Сотта Перизат Қайрат өз кінәсін мойындамай, қаржыны Палестинаға қолма-қол жеткізгенін растады. Оның айтуынша, банк арқылы аударым жасау әскери қақтығысты қаржыландыру ретінде қабылдануы мүмкін еді. Ол шетелге жиі шығуын осы себеппен түсіндіруге тырысты.
Алайда мемлекеттік айыптаушы Арман Кезекен бұл мәлімдемені жоққа шығарып, Қайраттың сапарлары БАӘ-де қымбат сауда жасау мақсатында болғанын айтты.
Қысым мен жалған мекенжай
Сот отырысында Перизат Қайраттың Kaspi Bank өкіліне қысым көрсеткені туралы тың дерек те жарияланды. Бұдан бөлек, тергеу барысында айыпталушының жалған мекенжай арқылы қор тіркегені белгілі болды.
Жәбірленушілер кімдер?
Іс материалдарына сәйкес, «BizBirgemiz Qazaqstan 2030» қорына ел азаматтары 30 мыңнан 200 миллион теңгеге дейін қаражат аударған. Жәбірленушілер қатарында кәсіпкерлер, мұғалімдер, жұмыссыз азаматтар мен қайырымдылық ұйымдарының өкілдері бар. Kaspi Bank тарапынан аударылған сома 620 миллион теңгені құраған.
Айыптау тарабының сұранысы
Мемлекеттік айыптаушы соттан Перизат Қайратты 10 жылға, анасы Ғайни Алашабаеваны 8 жылға бас бостандығынан айыру жазасына кесуді сұрады.
Сот үкімінің нақты қашан шығатыны алдағы күндері белгілі болады.
