Жуырда ауылдық кітапхана қызметкерлері «Еңбек – ырыстың қазығы» атты сыр-сұхбат өткізді. Бұр шара кәсібінен нәсіп тапқан Бақтыбала сынды еңбек адамына арналып ұйымдастырылып, Амангелді ауылдық округінің мәдениет қызметкері Болат Бижақсинов әсем әнмен шашу шашты.
Бақтыбала Уәлиқызы Қарауылтөбе ауылының тумасы, малдәрігерлік мамандығын алып, сол бағытта еңбек жолын бастап мал шаруашылығымен айналысады. 1994–1995 жылдары ұжымшарлар мен кеңшарлар таратылып, жеке шаруа қожалықтары құрылып жатты. Тоқырау заманындағы қиыншылыққа байланысты кәсіпкерлікке аяқ басты. «Сыбаға» бағдарламасымен ауыл шаруашылығын қаржылай қолдау қорынан несие алып, ірі қара, жылқы малын сатып алып, мал шаруашылығымен айналысты. Сонымен қатар, егін шаруашылығына да өзіндік үлесін қосты. 2009 жылы мал сою алаңын ашты. Бұл алаңның игілігін бүгінгі таңда үш ауыл көруде, мал біткен осы жерде сойылады. 2015 жылы «Атамекен» ҰКП құрамында іскер әйелдер қатарында Алматы облысы бойынша ауыл әйелдерінің алғашқы форумына қатысты. Ауылда тұрғаннан кейін ауылдастарына жағдай жасауды басты назарда ұстап, жағдайы төмен отбасыларға көмек көрсету мақсатында 2018 жылы «Рахмет» қайырымдылық дүкенін ашты. Үш ауылда бірде-бір тойхана болмағандықтан 2019 жылы «Рүстем» тойханасын Пограничник ауылынан ұйымдастырды.
Ауыл тұрмысын ажарландыруға қосқан еңбегі ескеріліп «Сарқан ауданының Құрметті азаматы» атағын алды. Сонымен қатар «Кәсіподаққа сіңірген еңбегі үшін» төсбелгісімен марапатталып, 2024 жылы есімі «Қазақстанның алтын кітабына» енді.
Бүгінде Бақтыбала Уәлиқызы 3 баланың анасы, 5 немеренің сүйікті әжесі. Осылайша жылдар жылжып зейнеткерлікке шықса да өз кәсібін дөңгелетіп, істеген игі істері еленіп, өз ісінің маманы атанған ол еңбектің құрметке жетелейтіндігін айналасына дәлелдеп келеді.
Ауылдастарының қошеметіне, алғысына бөленіп жүрген мейірімді жанмен арада болған сұхбат көрермендердің көңілінен шықты. Маңдай тердің өтеуін көріп келе жатқан еңбек адамына жиналғандар тарапынан «Сіз жұмысқа деген шабытты қайдан аласыз?», «Өз мамандығыңызды дұрыс таңдадым деп ойлайсыз ба?», «Алдыңызға қойған тағы да қандай мақсаттарыңыз бар?» деген сауалдар қойылып, кездесу кейіпкері атынан нақты жауаптар алынды.
Жақсылық ИГІМАН
