Мемлекет басшысының тапсырмасымен ел көлемінде іске асырылып жатқан «Ауыл аманаты» бағдарламасы ауыл тұрғындарына мол мүмкіндік сыйлаған бастама. Осы бағдарламаның игілігін көріп отырған Сарқан қаласының тұрғыны Шығысгүл Дәулетханқызы. Кейіпкеріміздің жүрек қалауымен таңдап алған мамандығы ұстаздық болғанымен бірнеше жыл көршілес Қытай мемлекетінде әйелдер бірлестігінде жұмыс істеді. Кейіннен аспаздық шеберліктен өтіп, атамекенге келіп, тәтті өнімдер дайындай бастады. Былтырғы жылы жоғарыда көрсетілген бағдарлама бойынша 5 миллион 300 мың теңге қайтарымсыз қаржы иеленіп, аталған қаражатқа қажетті құрал-жабдықтар алған.
– Атамекенге келгеннен кейін әртүрлі кәсіппен, тіпті саудамен де айналысып көрдім. 6 жыл бойы түрлі тауарларға тапсырыс түсіп, Қытай мемлекетінен алдырып жүрдім. Балаларым дүниеге келгеннен кейін соларды бағып-қараймын деп үйде отырып қалдым. Аспаз мамандығым болғаннан кейін осыдан 12 жыл бұрын Сарқан қаласының орталығынан кішігірім дәмхана аштым. Қолға алған ісім мардымсыз болғаннан кейін «Олжа» асханасына аспаз болып орналастым. Содан «Ауыл аманаты» бағдарламасы туралы естіп, тиісті құжаттар жинадым. Қаражат қолға тигеннен кейін арнайы құрал-жабдықтар алдым. Орталықта тамақтану орнымда 2 қыз бар. «Қойтас» саябағына демалушылар көптеп келгеннен кейін киіз үй сатып алып, ішін безендіріп, қонақтарға ет тағамдары мен қымыз ұсынамыз. 3 адамды тұрақты жұмыспен қамтып, жұмыссыздықтың азаюына өз септігімді тигізудемін. Тәтті торт дайындау – үлкен жауапкершілік пен шығармашылықты талап ететін жұмыс. Әрбір тапсырыс берушінің тілегін ескеріп, дәм үйлесіміне назар аударамын. Тойдың, астың дастарқанын да дайындаймыз, – дейді кәсіпкер келіншек.
Шығыс тағамдарының ерекшелігі – олардың мол әрі нәрлі болуында. Сондықтан да мұндай нәрлі тағам үлкен той-томалақ, мерекелік дастарқанға таптырмас дәм. Жергілікті тұрғындар арасында мұндай тағамдарға сұраныс көп, себебі олар қанық дәмімен және тойымдығымен ерекшеленеді.
«Қойтас» саябағына келетін демалушылардың сұранысын қанағаттандыру мақсатында Шығысгүлдің болашақта 8, 12 қанатты киіз үйлер орналастырып, қызмет көрсету жоспары да бар.
Жақсылық Игіман
