Жауаптылардың сөзінше, шараның негізгі мақсаты – қаланың сәулеттік келбетін жақсартып, тұрғындар үшін қолайлы әрі қауіпсіз орта қалыптастыру. Ал, мониторинг жұмысына қалалық сәулет және қала құрылысы бөлімі мен санитариялық-эпидемиологиялық бақылау басқармасының мамандары тартылған. Комиссия мүшелері облыс орталығындағы бірқатар сауда нысандарын аралап, иелеріне түсіндіру жұмыстарын жүргізіп, әрбір сауда орны заң талаптары мен санитарлық нормаларды қатаң сақтау қажеттігін жеткізді. Бұл жолғы тексеру барысында қаладағы «Мүшелтой» шағын ауданындағы бірқатар заңсыз орнатылған дүңгіршектер анықталып, иелеріне ескерту жасалған.
– Қазіргі кезде Талдықорған қаласы бойынша 162 сауда нысаны тіркелген. Оның 111-і рұқсатсыз, яғни заңсыз жұмыс істеп жатқаны анықталып отыр. Аталған нысандардың иелеріне құжаттарын заңдастыру немесе нысанды өз еркімен алу туралы ескертулер жасалды. Бұл бағыттағы тексеру жұмыстары алдағы уақытта да жалғасатын болады, – деді аймақтағы санитариялық-эпидемиологиялық бақылау басқармасының бас маманы Ақерке Мұхитқызы.
Айдын КӘЛІМХАН
