BAQ.KZ ақпарат агенттігі Қорғаныс министрлігіне әскери қызметкерлердің жалақасы мен әлеуметтік пакеті бойынша сауал жолдаған болатын. Министрлік жолдаған жауапқа сүйенсек, әскери лауазымдық жалақы 2025 жылғы 1 қаңтардан бастап бір рет өсті. Енді келесі жылдың басынан бастап олардың жалақысы тағы өседі.
Келісімшарт бойынша әскери қызметшілердің лауазымдық айлықақыларын арттыру 2025 жылғы 1 қаңтардан бастап еңбекақы төлеудің жаңа жүйесіне көшу бойынша жүзеге асырылды, екінші кезең 2026 жылғы 1 қаңтарынан бастап жүзеге асырылады. Нәтижесінде әскери қызметшілердің көпшілігінде лауазымдық айлықтары өсті, — делінген жауапта.
Сондай-ақ, әскери қызметшілерге бұрын тоқтатылған жеңілдіктерді қайтару бойынша жұмыс жүргізіліп жатыр:
- әскери қызметшілерге коммуналдық қызмет үшін төленетін үстемақыны отбасының әрбір мүшесіне төлеу арқылы көлемін өзгерту;
- әскери қызметшілер мен оның отбасы мүшелерінің жылына 1 рет демалыс орнына барып-қайту үшін жол жүру ақысын тегін етуді қайтару;
- әскери қызметшілердің қоғамдық көліктерде тегін жүруін қайтару;
- әскери қызметшінің жауынгерлік, жұмылдыру, оперативті дайындық бағдарламалары бойынша 1 тәуліктен артық далалық жағдайларда болуы барысында, сондай-ақ арнайы далалық жұмыстарды орындауда тәуліктік норманың 60% есебінен ақшалай үлесті қайтару.
Әскери қызметшілерге «Әскери қызмет және әскери қызметшілердің мәртебесі туралы» Қазақстан Республикасы Заңының 44-бабының 9-тармағына сәйкес 2025 жылғы 1 шілдеде 1,2 АЕК мөлшерінде далалық төлемдер жүзеге асырылады, — деді Қорғаныс министрлігі.
Дереккөз: BAQ.KZ
