Облыстық әкімдікте өткен кездесуде Әсет Серікұлы:
– Ернұр, бұған дейін өзің облыс әкімі Бейбіт Исабаевтың қабылдауына келіп, тұрғын үйге қатысты мәселеңді жеткізген болатынсың. Сол қабылдаудан кейін осы істі шешудің жолдарын жан-жақты қарастырып, облыс әкімдігінің ұсынысымен «Жетісу қолдау» қоғамдық қорының қаржылай көмегімен бұл мәселе шешімін тапты. Бүгін өздеріңе Талдықорған қаласынан пәтер кілтін тапсырғалы отырмыз. Пәтерге арнайы жөндеу жұмыстары жүргізілді. Қарындасыңның сабаққа барып-келуіне қолайлы болсын деп пәтерді жанында мектеп орналасқан үйден алдық. Жаңа пәтер құтты болсын! Барлық қиыншылық артта қалып, болашақтарың жарқын болсын, – деп жылы лебізін білдірді.
Осыдан кейін «Жеті-су – қолдау» қоғамдық қорының басшысы Рүстем Байтұманов: «Өткен жылдың соңында болған оқыс оқиға бәріміздің жанымызға батты. Біз қолымыздан келгенше көмектесуге тырысамыз. Облыс әкімінің ұсынысымен сіздерге жаңа пәтер сыйлаймыз», – деп жаңа пәтер кілтін табыс етті.
«Халық үніне құлақ асатын мемлекет» тұжырымдамасын іске асыруда облыстық әкімдік қиын жағдайда қалған Ернұрдың көңілін бір серпілтіп тастады. Айта кетейік, «Ғарышкер» шағынауданынан берілген 2 бөлмелі пәтерге толықтай жөндеу жұмыстары жүргізіліпті. Қолайлы өмір сүруге барлық жағдай жасалған. Екі бөлмелі баспана 52 шаршы метрді құрайды.
Қоныс иесі атанған Ернұр Жүкен: бізге қолдау көрсетіп, жанашырлық танытқан облыс басшысы мен демеушілерге шексіз ризашылығымды білдіремін, – деді.
Айдар ҚАЛИЕВ
